EWILIKONGUNDU lyo Road Fund Administration[RFA] olya gongala komatango getitatu oshiwike shika nolya kundathana omatamaneko gomuyonena ngoka tashi vulika li ningile omunambelewa omukuluntupitithi gwa RFA nale.
Omatamaneko otaga ka kwatelamo elundilo kutya nguka aniwa okwa li a londeke ondjambi ye inaa pitikwa oku shi ninga kewilikongundu. Ewilikongundu olya li woo lya tokola kombinga yiimaliwa mbyoka tali ka pa ,Penda Kiiyala ,konima sho nguka a tokola okuthigapo iilonga, oku yanda oku holoka komeho gongundu yevulikitho. Kiiyala ota lundilwa kutya okwiigwedhele kondjambi ye noodola omayovi 500 000 mu April omumvo gwayi, inaa pewa epitikilo kewilikongundu, okuza poodola omiliona yimwe oshinkwanu hamano oku ya koodola oomiliona mbali oshinkwanu yimwe. Oshifo sho The Namibian osha kundana kutya oshigongi shika osha ithanwa konima sho Kiiyala aniwa a ulike kutya okwa hala oku pewa etata lyiiyemo ye yokomumvo ongo epandulo. Omwaalu ngoka ogwa tegelelwa gu kale oodola 800 000.Oshilyo shimwe shewilikongundu lya RFA osha ti yo oyena uumbangi wa gwana komalundilo ngoka ya ningile Kiiyala, onkene nguka ita vulu oku ya lombwela kutya okwa hala oku ningilwa shike. Okwa tsikile a ti ngele ota pula iinima yontumba a hala oku yi ningilwa osha fa sha hala okutya ewilikongundu kali na uumbangi washa. Okwa ti ishewe ewikilokongundu ina li pula nando omuntu a thigepo iilonga.Oshilyo shika osha ti ewilikongundu alihe olina okugongala nokuninga etokolo limwe kombinga yonakuyiwa ya Kiiyala. Omunambelewa nguka okwa tseyithile kutya ota thigipo iilonga ye Olyomakaya ga yi omanga kuna ashike esiku limwe opo a ka hokololithwe kombinga yomalundilo ega ningilwa. Okwa tokola ishewe okuthigapo iilonga a thigiko oomvula ne keuvathano lyiilonga ye yuule womimvo ntano.Kepulo ngele oshili nawa oku gandja epandulo komuniilonga ngoka a thigipo iilonga, omuwiliki gwolutu lwomapekaapeko komilandu dhopashigwana nenge Institute for Public Policy Research[IPPR], okwa ti oshinima itaa shi uvikako kutya ehangano ota li futu omuntu ngoka ta zi miilonga epandulo. Okwa pula kutya omolwashike ehangano lyepangelo lina okufuta iimaliwa yoludhi ndoka. Graham Hopwood okwa ti itashi uvikako kutya omolwashike ena okufutwa, unene tuu kutya omuntu ota thigipo iilonga yemwene , unene sho ta ku tiwa ota tamanekwa nokuvulikithwa.Okwa ti osha pumbiwa opo omauvathano giilonga gaawiliki yomahangano mu kale mwa shangwa kutya omunambelewa ngoka ita futwa sha ngele okwa thigipo iilonga ku yemwene. Shoka sha simana ooshoka kutya ofuto ndjika oyina okupewa omunambelewa ngoka a longo nawa ndele hamunambelewa ngoka tashi vulika inaa longa nawa.Kiiyala okwa li a tulwa pevi okuza mu May nuumvo konima yekonakono lya li lya ningwa kehangano lyokuyalula omambo lya Deloitte&Touche moshinima shokugongela iimaliwa ha yi futwa kiiyenditho yoondongelwa ngele tayi piti poongamba.
