Okomisi yomahoololo oya wapaleka eembapila domahoololo

Okomisi yomahoololo yaNamibia oya ti oya wapaleka omapuko aeshe oo a li meembapila domahoololo nomwaalu wa wana weembapila domahoololo owa li wa yandjwa ongula yEtivali.

Omukulunhu wokomisi yomahoololo Peter Shaama oshinima eshi okwe shi popya momukanda Etivali.

Eembapila domahoololo okwa li da etwa koHosea Kutako International Airport.

“Oimaliwa aishe oyo ya longifwa mokuninga eembapila da wedwa po okwa li i li komapepe ehangano olo la pewa oilonga ei.

Eshi da fika, okwa li da twalwa komungulilo yoikwa noipangifo yokomisi yomahoololo da findikilwa koshi yewiliko lopolifi di ka konakonwe, di ka tukulwe nokupakelwa she likolelela koikandjohoololo needoolopa,” osho a ti ngaho.

Oshinima eshi osha landula eshi kwa li kwa monika kutya eembapila inadi wana nadimwe okwa li eekopi komungulilo yepangelo Etitano loshivike sha dja ko.

Shaama okwa ti omulandu wokukoleka, okupakela nokutukula okwa li wa tameka Etivali omutenya komesho yovakalelipo veengudu dopolitika, omahangano neekandidate.

Omapuko okwa li a didilikwa meembapila doikandjohoololo imwe nomalelo eedoolopa moshitopolwahoololo shaKavango Uninginino, Ohangwena, Omusati, Oshikoto, Otjozondjupa, Kunene, Erongo noKhomas, osho kwa li sha kuma omwaalu oo wa pumbiwa peenhele dokuhoololela.

Okutwala oinima yomahoololo keenhele odo kwa li da kumwa koshinima eshi okwa tameka onghela koshi yewiliko lopolifi.

“Okutalulula nokukoleka oinima aishe ya fimana otaku ka ningwa poitaashi yopolifi yopaitopolwahoololo ngee ya fiki koitopolwahoololo oko ya nuninwa,” Shaama osho a ti ngaho.

Oinima yomahoololo ei, okwa weda po kutya, otai kala ya tuvikilwa nawa poitaashi yopolifi fiyo efiku loku i twala keenhele oko taku hoololelwa momafiku 23 Novemba, mokulilongekidila omahoololo owina momafiku 24 no25 Novemba nosho yo omahoololo oovene momafiku 26 Novemba.

Ashike nee, omukalelipo wongudu yoLandless People’s Movement Ivan Skrywer okwa yandja oushima ketalululo leembapila edi shaashi okomisi yomahoololo oya dopa okukala omutumba neengudu dopolitika.

“Ova ya ndee tava ka pula eembali domahoololo dipe inava kundafana nafye, inatu lineekela okomisi yomahoololo nomulandu aushe owa ngwangwana,” osho a ti ngaho.

Hamushangandjai wongudu yoPopular Democratic Movement Manuel Ngaringombe naye okwa holola eudonai kombinga yokomisi yomahoololo, eshi ya dopa okukundafana neengudu dopolitika.

Skrywer okwa ti, ovalopoti voikundaneki ovo va li komungulilo va teelela eembapila di fike okwa li va kufwa mo moshoongalele kopolifi shaashi okwa li sha nuninwa okukala konima yomivelo.

Skrywer okwa ti oshinima eshi otashi kumwifa, ta ti otashi holola kutya kapu na okulonga pauyelele eshi okomisi yomahoololo tai kendabala okuninga oshoongalele meholamo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.