Okomisi yomahoololo otai ti omhangu yomahoololo itai dulu okuungaunga noshibofa shoNEFF

Okomisi yomahoololo yaNamibia yedina Electoral Commission of Namibia (ECN) otai patana kutya omhangu yomahoololo otai dulu okulonga noshibofa osho ongudu yoNamibia Economic Freedom Fighters (NEFF) tai kendabala okukondjifa etokolo loECN lokwiikufa mo meengudu dopolitika.

Ovakalelipo vopaveta vaSouth Africa ovo kwa li va tumwa opo ve uye va kalele po oNEFF momhangu yomahoololo Etivali, omukalelipo wopaveta akula Dali Mpofu naLerato Moela, inava pataneka vali oshikumungu eshi ngaashi kwa li sha longekidwa, konima eshi kwa li vaanyenwa omikada doilonga koshikondo shi na sha nomatembu, oshinima osho omupeduwiliki wongudu ei Kalimbo Iipumbu ta ti omukalo wakaka. Omukalelipo wopaveta voECN okwa lombwela omhangu yomahoololo nomukalelipo woNEFF Kadhila Amoomo pexulilo loshivike sha dja ko kutya oECN oya ti, omhangu yomahoololo kai na eenghono noufemba wokupwilikina omukandaindilo womeendelelo oo wa yandjwa koNEFF konima yoivike itatu ya pita lwaapo.

Eindilo loNEFF okwa li la pumbwa okutwalwa komhangu yopombada, ndee kali shi nande oshikumungu shomhangu yomahoololo, haende Gerson Narib, oo a kalela po oECN, osho a ti ngaho pefimbo loihokolola yopakanya komesho yomupedu panguli pelesidente Hosea Angula nomhupanguli Orben Sibeya naBeatrix da Jager Etivali.

Ongudu yoNEFF oyo kwa li ya findana oipundi ivali momutumba wopashiwana muNovemba momudo 2019 momahoololo ovanapaliamente, otai pula omhangu opo i lombwele oECN iha twikile netulomoilonga letokolo layo lokukufa mo ongudu yoNEFF meengudu dopolitika.

Ongudu yoNEFF oya yandja elombwelo natango kutya otai ka pula omhangu yomahoololo opo i talulule nokukaleka etokolo loECN, olo kwa li la ningwa momafiku 17 Juni neudo, opo i kufe mo ongudu meengudu dopolitika, nokupopya kutya etokolo olo kali li paveta, nopakotamhango loo inali pumbiwa.

Omhangu oya undulila komesho eemhangu edi komafiku 08 Auguste. Momukanda oo wa wa yandjwa komhangu, Mpofu naMoela ova ti etokolo loECN lokukufa mo oNEEF meengudu dopolitika oshinima inashi udika nale. Natango ova ti kutya etokolo loECN okwa li la ningwa unene diva, shaashi oNEFF kakwa li ya pewa omhito i yandje ehokololo layo omanga etokolo inali ningwa, noho etokolo kali li mondjila.

Etokolo loECN lokukufa oNEFF meengudu dopolitika, shaashi ongudu oya dopa okuyandja omikanda odo tadi ulike nghee ya longifa oshimaliwa kokomisi ngaashi okatendo komahoololo taka pula. Mpofu naMoela ova didilika momushangwa wavo kutya oECN muJuni odula ya dja ko okwa li ya pa oNEFF fiyo omuNovemba wodula ya dja ko opo i yandje omikanda dayo odo kwa li inadi yandjwa kokomisi.

MuApilili odula ei, efiku laxuuninwa okwa li la undulilwa pexulilo laJuni, osho va ti ngaho.

Momafiku 18 Juni, oNEFF okwa li ya yandja omikanda dayo doshimaliwa domudo 220/21 no2021/22 nokwa li va tula po eudafano opo va yandje odo kwa li da shaala ko momafiku 18 Juni, ovakalelipo vopaveta ovo vavali osho va ti ngaho.

Ashike nee, okomisi yomahoololo oya tokola momafiku 17 Juni opo i kufe mo ongudu meengudu dopolitika. Okomisi yomahoololo oya kufa etokolo olo omanga inai pa oNEFF omhito opo i yandje ehokololo layo nande okatendo komahoololo otaka ti okomisi yomahoololo otai dulu okukufa mo ongudu meengudu dopolitika konima eshi ya yandja omhito kongudu opo i yandje ehokololo layo, Mpofu naMoela osho va ti ngaho.

Momukanda waye, Narib ota ti kutya omhangu yomahoololo omhangu ye li kalekelwa ya totwa opo i ungaunge noikumungu oyo ya popiwa mokatendo komahoololo.

Okatendo okangabeka eenghono domhangu yomahoololo kombinga yoinima yoludi eli tai di kovakwaveta, oshikumungu shoNEFF kashi li shimwe shomwaayo, Narib osho a ti ngaho.

Eindilo longudu kali na sha nokuninga omahoololo ile omilandu odo di na okuningwa manga ile konima yomahoololo, ndee molwetomeno eli kashi shi nande oshikumungu shomahoololo, Narib osho a ti ngaho.

Okatendo komahoololo otaka pula eengudu dopolitika opo di ongele omishangwa doshimaliwa kokomisi yomahoololo keshe kodula, Narib osho a ti ngaho.

Okwa ti vali okatendo oka yandja eenghono koECN opo i kufe mo ongudu oyo oECN i wete kutya itai landula okatendo.

Okomisi yomahoololo oya kala nokutumina oNEFF omikanda di na sha nokwoongela omikanda doshimaliwa dongudu nokwa li ya londwela oNEFF momukanda womomafiku 25 Apilili odula ei kutya ngee inai ongela omikanda odo moule womafiku 14, okomisi otai ka longifa okatopolwa kokatendo komahoololo oko ka yandja epitikilo opo i kufe mo oNEFF meengudu dopolitika, Narib osho a ti ngaho. Okwa ti natango oNEFF okwa li i na omhito ya wana opo i yandje ehokololo layo, ashike kakwa li nande ya longifa omhito oyo opo i yandje ehokololo layo omanga oECN kwa li inai tokola okwiikufa mo meengudu dopolitika.

Amoomo okwa li a kalela po oNEFF pefimbo loihokolola yokomhangu. Narib okwa li ta vatelwa kuhaende wepangelo Cynthia Endajambi.

OVAKALELIPO VOPAVETA OVAKELELWA

Iipumbu okwa lombwela oikundaneki Etivali kutya oNEFF oyaanya omukalo wakaka wepangelo tali anyene ongudu oufemba wayo wekotamhango wokuhoolola ovakalelipo vopaveta ovo ya hala. Iipumbu okwa ti ovanambelewa vopeengaba okwa li va hala Mpofu naMoela opo va ulike eedjapo davo douhongelwe.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.