Eumbo lepangelo ole lipyakidila nokutalulula oveta yomauwa eepresidente dikulu, ngaashi okutungilwa omaumbo kepangelo, opu na omapopyo kutya presidente Netumbo Nandi-Ndaitwah okwa hala okutula ko oshitwa koshinima eshi.
Ovanhu ovo tava dilaadila ve mu fa otava ti presidente ita popile nande okutungilwa omaumbo kepangelo ashike ota popile okupewa oshimaliwa a tunge eumbo laye mwene ngee a i moshipundi shetulumuko.
Etalululo lokatendo keependjela nomauwa amwe eepresidente dikulu otali ka tala yoo nokokuyandja omauwa oludi eli kovapedu presidente.
Omangha oshiwana tashi patana unene kombinga yeemiliyona di li N$152 da longifwa okutunga omaumbo eepresidente nhee dikulu, omapulo kombinga yokuyandja eembelewa komitwe doshilongo odo di li moshipundi shetulumuko nao okwa ninga ahapu.
Konima yokuya moshipundi shetulumuko, presidente mukulu Hifikepunye Pohamba okwa li a pewa ombelewa ya taalelafana noWindhoek High School. Eshi okwa li ashike okuweda keumbo laye olo a tungilwa leemiliyona N$35 moAuasblick.
Konima, ovanambelewa vakula vepangelo okwa li va udaneka okukonga ombelewa iwa yokuhiila yapresidente mukulu Hage Geingob.
The Namibian okwa uda kutya epangelo okwa li la dilaadila kutya presidente mukulu Nangolo Mbumba na longife ombelewa yaPohamba mOvenduka, netomeno lokutya presidente omutivali woshilongo iha kala mo naana moshilando.
Nande omupopiliko weumbo lepangelo okwa anya okutya sha kombinga yomaliudo apresidente e na sha nomaumbo eepresidente dikulu oshivike eshi, okwa koleka kutya onotwaveta otai talululwa kukonakonwe omauwa eepresidente dikulu novapedu presidente.
“Oveta natango otai talululwa kokomitiye yopombada ashike natango inai yandjwa kupresidente a tye ko sha.
Nande presidente otashi dulika e na omaliudo aye kombinga yoshinima eshi, eshi otashi ka shiivika ashike ngee oveta ya yandjwa kuye pambelewa nokonima tai yandjwa kOkabinete ita lululwe,” osho a ti ngaho.
Mbambo okwa ti onotwaveta otashi dulika i ka yandje nomauwa kovapedu presidente.
“Oshinima shimwe osho tashi talululwa oshi na sha nokukwatela mo ombelewa yomupedu presidente, oyo paife inai kwatelwa mo moveta yopaife, shaashi ombelewa ei kaya li po eshi oveta ei kwa li ya tulwa moilonga momudo 2004,” osho a ti ngaho.
Omupopiliko weumbo lepangelo okwa ti onotwaveta otashi dulika i ka yandjwe komutumba wopashiwana neudo.
Onotwaveta ei tai lalakanene okushonopeka omauwa eepresidente okwa li ya dilaadilwa kuGeingob, ashike kakwa li nande ya twalwa kopaliamente.
Omundjadjukununi woikwapolitika Henning Melber okwa ti naku kundafanwe ngee omaliko otaa ningi opaumwene nokonima eepresidente dikulu da xulifa ile eepangelo.
“Oshinima sha fimana osheshi kutya eepresidente dikulu neefamili dado otava dulu nale okukala mo xwepo keependjela davo odo ihadi xulu.
Omauwa akwao a wedwa po otaa yambula po ashike omaxupilo avo ondilo,” osho a ti ngaho.
Omundjadjukununi woikwapolitika Ndumba Kamwanyah okwa ti okwa itavela kutya omauwa opendjela eepresidente dikulu naa talululwe she likolelela konghalo yeliko laNamibia paife.
“Omauwa opaife aahapu unene pakuyelakanifa nomaudjuu Ovanamibia akeshe efiku,” Kamwanyah osho a ti ngaho.
Oshilyo shongudu yoIndependent Patriots for Change Rodney Cloete okwa ti omaumbo a tungwa kepangelo naa kale omaliko epangelo. “Kapu na vali okutungila ovanhu va pendjelwa omaumbo mangha Ovanamibia vahapu ve li moubashu,” osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
