Okanyofi kokOnandjokwe kongushu yeemiliyona N$59 inaka pwa natango konima yeedula hamano

… oshitandelo osha wapalekwa koshimaliwa shi fike pomiliyona oshinghwanyu hetatu

Oknyofi koshipangelo shaNandjokwe moshitopolwa hoololo shaShikoto oko ka kala nokulongwa efimbo lile natango inaka pwa okulongwa.

Oproyeka ei yoshimaliwa shi fike peemiliyona N$59 tai tungu eenduda dokuteelelela nokumonena ounona di li 90 okwa li ya tameke momudo 2018.

Oshinima eshi okwa li sha popiwa kungoloneya woshitopolwahoololo shaShikoto Penda ya Ndakolo pefimbo kwa li ta yandje ouyelele kwaasho tashi li nyenge moshitopolwahoololo kOmuthiya Etitano.

Ya Ndakolo okwa ti ngee oilonga ei ya pu, oproyeka otai ka twala omayakulo pombada notashi dulika nokuli i ka shonopeke omafyo oo haa holoka pefimbo lokumona ounona.

“Oshitandelo nasho osha wapalekwa koshimaliwa shi fike pomiliyona oshinghwanyu hetatu, osho sha xwepopaleka eyandjo lomayakulo nosha shonopeka okutumina ovanhu koshipangelo shaShakati nokOvenduka.,” Osho a ti ngaho.

Ya Ndakolo okwa ti otenga yomeva oyo kwa li tai longwa koshipangelo shaMuthiya nayo oya pwa okulongwa.

“Oshinima eshi osha ningwa opo kuxwepopalekwe eyandjo lomeva koshipangelo ngee omeva aNamwater a pata,” Osho a ti ngaho.

Ngoloneya natango okwa ti vali oilonga yokuwapaleka oyo ya li kokapangelo kokOmuntele nayo oya pwa.

“Okutunga onhele yomayandjo omayakulo opaundjolowele yedina Omeyantalala, otenga yomeva yeelita 10 000 nosho yo okutula onhele moluumbo koshikandjohoololo shaKankolo, osho sha kwashilipalekwa koshikefa shoshimaliwa shopaunyuni opo kuxwepopekwe omayakulo e na sha noundjolowele, na yo oya pwa,” Ya Ndakolo osho a ti ngaho.

Okwa ti oministili youndjolowele nomayakulo opanghalafano otai twikile nokutunga eenhele dokweekelwa oinima oyo ya longa noyanyika oshiponga koupangelo ngaashi okOnkumbula, Onyuulaye nOnakazizi opo kuxwepopalekwe oukoshoki.

Omukulunhuwiliki woundjolowele koshitopolwahoololo shaShikoto Josua Ngipangelwa okwa ti ovakainhu ovo va teelela okumona ounona paife ohava longifa okanyofi kakulu omanga aka kape taka pu okulongwa.

“Okumona ounona koshipangelo shaNandjokwe okwa ya pombada shaashi oshipangelo ohashi yandje omayakulo kovanhu va dja koitopolwahoololo itatu, ombinga imwe yOshana, Oshikoto nOhangwena, osho hashi eta omumbwe yeenhele efimbo limwe, ashike oomeme ohava longifa omatungo akwao omanga va teelele okumona ounona,” Osho a ti ngaho.

‘EKATEKO ASHIKE’

Omukulunhuwiliki woministili youndjolowele nomayakulo opanghalafano Ben Nangombe okwa ti oproyeka oi li pokupwa shaashi eepelesenda 70 doilonga oda pwa nale.

“Okwa li ashike pu na ekateko la kwatela mo omunhu wotete oo kwa li ta longo oilonga ei ndee hatu eta po omunhu umwe a mane oproyeka ei.

“Okwa li twa tameka okukonga omauyelele, nomukwati wotendela ine ya natango koilonga,” Osho a ti ngaho.

Okwa ti aishe oi li peenhele noilonga otai ka tameka diva.

“Otwa hala oproyeka ei i manifwe diva ngaashi tashi dulika,” Osho a ti ngaho.

Omwedi wa dja ko oThe Namibian okwa li ya lopota kutya oomeme ovo ve li momateelelo koshipangelo oko ova kala nokunangekwa motenda okudja ngaa momudo 2018, shaashi onhele yokuteelelela inai pwa okulonga.

Oshinima eshi okwa li sha monika kokomitiye yopaliamente i na sha nefikopamwe lopaukakwashikekookanhu, eyambulepo loinima ya pamba onghalafano nosho yo oikumungu yeefamili kwa li ya talela po oshipangelo pefimbo opo.