Ehangano lokuninga omapekapeko omilandu depangelo ledina Institute for Public Policy Research (IPPR) ola ti okabinete inaka kala ka kwatelwa mo mokuulika omukulunhuwiliki wehangano lokulanda oipumbiwa yepangelo ledina Central Procurement Board of Namibia (CPBN).
Omupekapeki wehangano lokuninga omapekapeko epangelo Frederico Links okwa ti euliko olo la ningwa omafiku aa lomukulunhuwiliki woCPBN okwa li la kwatela mo opolotika, osho tashi teya elifikamenepo lehangano.
Links eshi okwe shi popya pepatululo loshoongalele shoProcurement Tracker Namibia 24, osho sha li shi li koshi yoshipalanyole: ‘Data Deficit Undermines Governance And Oversight’ mOvenduka Etitatu.
“Okutala kefimano nokedina lehanagano, kapu na nande oshinima oshopaveta tashi yandje eenghono kokabinete opo ka dule okuhoolola ile okwaanya ehoololo lomukulunhuwiliki woCPBN,” Links osho a ti ngaho.
Links okwa ti, efimbo lile la pita, okulidopa mo kopolotika mokuhoolola ovakulunhuwiliki meembelewa depangelo okwa eta ounghundi moikondo yepangelo nosha lyatela pedu elineekelo loshiwana.
Eemwedi mbali da dja ko, okwa li kwa lopotwa kutya ominista yoshimaliwa Iipumbu Shiimi okwa li ya hoolola Idi Itope oye a ninge omukulunhuwiliki wehangano loCPBN.
Pefimbo opo , okabinete okwa li ka yandja elombwelo kuShiimi opo a tatulule etokolo laye konima yomapopyo kutya ovanhu ovo kwa li va ninga nawa unene momapulaapulo okwa li va koyelelwa kokandidate oko kwa li ke ya ka xuuninwa.
Natango, omukulunhuwiliki woikwaipindi kehangano loTelcom Namibia Calvin Muniswaswa, omukulunhuwiliki woministili yomauyelele nomakwatafano opaungoba Adrin Mathe, omukulunhuwiliki wehangano ledina Investment Promotion and Development Board (NIPDB) Richwell Lukonga, nomupedukunhuwiliki mouministili woikwafabulika Michael Hamavindu navo okwa li va ninga endilo lomhito oyo.
Natango vali, Links okwa pula opo ehangano lokulanda oipumbiwa yepangelo li kale ehangano le lifikamena opo, li dule okukala hali dulu okukalela po oinima yalo vene.
“Ehangano lokulanda oipumbiwa yepangelo inali kala li li koshi youministli woimaliwa, oshinima eshi itashi tu kumwe,” Osho a ti ngaho.
Omuwiliki wongudu yoPopular Democratic Movement (PDM) McHenry Venaani okwa ti ota popile osho tashi pulwa kehangano lokuninga omapekapeko omilandu depangelo opo ehangano lokulanda oipumbiwa yepangelo li kale le lifikamena po loovene, ponhele yokukala li li koshi youministili woimaliwa.
“Otwa ninga omalunduluko ahapu kombinga yeeveta opo tu dule okuninga ehangano lokulanda oipumbiwa yepangelo li kale le lifikamena po loovene, otwa pumbwa okukala tu na olutuwiliki tali dulu okulineekelwa,” Venaani osho a ti ngaho.
Natango okwa twikila ndee ta ti okulidopa mo kwepangelo mehangano omu otaku lyatele pedu okulongo pouyelele nokukalela po keshe osho tashi ningwa mehangno omo, shaashi luhapu omahangano oo haa mono eetendela oo vanhu ovo ve na omakwatafano nova napolotika.
Okwa yandja oshiholelwa shoministili youhaku, oyo tai longo noulingilingi neenghono, nomahangano ahapu oo a mona eetendela edi osha pitila momukalo wokunyeka.
Omupopiliko woshikondo shoimaliwa Wilson Shikoto okwa ti ita nyamukula nande omapulo oo kwa li a tuminwa pefimbo oshifokundaneki shanyanyangidwa.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
