Okaana Kokamati keedula (16) okwa li ka kwatwa keenghono koTses koshitopolwahoololo sha//Kharas omutenya wEtitano la dja ko.
Olopota yoimbula yomexuuliloshivike oya ti, omufeekelwa oo e shiivike okwa sha ke na nokaana aka mepya ndee ta ti nava ye naye opo va katale ko kongobe yatatekulu ko. Omanga kwa li ve li mondjila, omufeekelwa okwa nana nakuningwa oshihakanwa, ndee te mu mange keenyala omanga ine mu kwata ongonga, olopota yoimbuluma osho ya ti ngaho.
Otaku tiwa natango konima eshi omufeekelwa a kwata okaana keenghono, okwa mangela omaoko ko mefina lomuti ndele te ka lombwele kutya ote ya mongula opo e ka dipaye. Nakuningwa oshihakanwa okwe shi pondola opo e limangulule mo ndele ta i kutatekulu waye a ka lopote.
Omufeekelwa ina mangwa po ashike omakonaakono opolifi otaa twikile natango. Moshiningwanima sha yooloka, okaana kokokaadona keedula (12) okwa li ka kwatwa keenghono komumwainamati weedula (17) kEndola metitano. Omakonaakono opolifi otaa twikile.
Natango moshiningwanima shimwe , olutu lomulumenhu omuZambia, Simasiku Malilo (46), okwa li la monika komukunda wedina Jojo koshitopolwa shaNgoma Muzi.
Omupopiliko wopolifi moNamibia komufala Kauna Shikwambi, okwa ti Malilo nomufeekelwa umwe womulumenhu (32) okwa li tava nu omalodu omanga oshiningwanima inashi ningwa.
“Konima yefimbo vati, omukulukadi wanakufya okwa uda omaweelelo pondje yeumbo ndele eshi a tala okwa mona omulumenhu womufika ule tadi po, ta ti ‘Inda u ka lombwele opolifi yomomudingonoko, inandi i tila’”
Shikwambi okwa ti omukulukadi waMalilo vati okwe mu hanga a nangala pedu, ita dulu okupenduka po omanga kwa li ta di ohonde komayulu.
Okwe mu vatela opo va ye keumbo lavo, osho a ti ngaho.
“Efiku la landula vati okwa lombwela omukulukadi waye kutya okwa dengwa komufeekelwa ou a mangwa po,” Shikwambi osho a ti ngaho.
Omukulukadi waMalilo okwa ti omushamane waye okwe mu lombwela kutya okwa fangwa medimo nomonhulo ndee okwa li ta luluma unene.
Eshi a pula omushamane waye kutya oshike she mu dengifa, omushamane ina nyamukula, Shikwambi osho a ti ngaho.
Ofamili yaMalilo oya lopotelwa kombinga yoshiningwanima, nomakonaakono opolifi otaa twikile.
Moshiningwanima shikwao, olutu lomulumenhu (32) okwa li la hangwa mepya lomuhona waye komukunda wedina Oshika koshitopolwa shaNesi mOlomakaya.
“Otaku tiwa vati nakufya , oo kwa li ha longo meumbo okwa li a tumwa kOutapi komuhona waye opo a ka nane oshimaliwa kombaanga yomuhona ndee ta lande oitungifo mEtitano.
“Vati okwa nana oshimaliwa ashike okwa dopa okulanda oitungifo oyo a tumwa, yee ina eta nee oshimaliwa komuhona waye. Okwa alukila keumbo mokati koufiku, ndele ongula olutu laye okwa li la hangika mepya.”
Ovakwanedimo vomulumenhu ou ova lopotelwa nale efyo laye nomakonaakono opolifi otaa twikile natango, Shikwambi osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
