Oiyuma i li elimba limwe ihai pu kupumafana

. . . Ekwatafano laSwartbooi naSeibeb ola nyika oipa yombwa

Pelesidente wongudu yoLandless People’s Movement (LPM), Bernadus Swartbooi nomupedu waye Henny Seibeb, otaku tiwa ova kala itava popi oule weemwedi hetatu paife.

Eshi osha eta omalipulo kombinga youkumwe wongudu eshi kwa taalelwa omahoololo opashiwana muNovemba.

Ovaholi vopolotika Swartbooi naSeibeb ova tota ongudu ei momudo 2017, ndele tave i shangifa ongongudu yopolotika tai popile ouyuuki wopamakwatafano nefikopamwe lovanhu aveshe momafiku 08 Febuluali 2019.

Ongudu oya findana oipundi omulongo mopaliamente nainhe momutumba wopashiwana naihamano mewiliko lodoolopa.

Ashike nee, ovaleli ava vavali kave lihole vali, oilyo imwe yomongudu otai ti ongudu oya ninga ombete yolwaambo noungudu ve litopola.

MuNovemba odula yandja ko, Swartbooi naSeibeb okwa li va fa ve li kumwe eshi kwa li va ninga oshoongalele mOvenduka.

Ashike eedjo dimwe otadi ti ova kala itava popi okudja ashike odula ya dja ko muJuli eshi kwa li ve lipuma mumwe mopaliamente.
Oshinima eshi otaku tiwa oshi shiivike nawa momutumba wopashiwana.

Ovatotiveta vamwe okwa li tave va yolo eshi hava kala omutumba pamwe nande itava popi.
Swartbooi oshivike sha dja ko, nande ongao, okwa ngabeka omapopyo kutya ongudu oya topolwa nokwaanya okunyamukula omapulo kombinga yekwatafano lavo naSeibeb.

“Ongudu yoLPM kai na fiku i tukauke, kutya nee omunhu ota kendabala shi fike peni. Otu li ashike mondjila yokuxuma komesho,” Osho a lombwela oThe Namibian ngaho.

Seibeb okwa koleka kutya ekwatafano lavo ola kala lihe li nawa noli yadi omaupyakadi. Oshoondaxa okwa ti kutya ekwatafano laye naSwartbooi kali li ngaashi la kala eshi oLPM ya totwa.

“Ekwatafano letu lopaife ola pita momaudjuu noitali ulike vali oumbushe moilonga ngaashi la kala nale pefimbo olo kwa li hatu i kofikola nopefimbo eshi oLPM opo ya totwa,” Seibeb osho a ti ngaho.

“Opa kala pu na oinima imwe ipe oyo ya ninga ekwatafano letu li lula osho sha eta opo pu kale puhe na vali elineekelo nombili ya kola,” Osho a ti ngaho.

OSHILI YOOVENE OYEI

Oilyo imwe yongudu oya ti Seibeb ina holoko koyoongalele imwe ya kula yongudu odula ei.

Kakwa li e li umwe womoilyo yoLPM oyo kwa li ya ya koCasa Rosalia koshivilo dimbuluko shapelesidente Geingob muFebuluali.

Eshi osha kwa tela mo nehongo olo la li kopaliamente pexulilo laFebuluali la li koshi yoshipalanyole “Reflection on the LPM Party over the past five Years”. Seibeb natango ka li a ya kedalo longudu koTsumeb nokoshongaalele shongudu sha li kOshivanda (Grootfontein) momafiku 02 fiyo 03 Marsa.

Seibeb natango okwa li a faula koshivilo shokakomisi komahoololo osho sha li mOvenduka Etine la dja ko, oko kwa li kwa ya Swartbooi nakamusela melelo lodoolopa yaVenduka Ivan Skrywer.

SEIBEB OKWA FATULULA

Seibeb Oshoondaxa okwa lombwela oThe Namibian kutya okwa li e na elineekelo kutya ekwatafano lavo naSwartbooi otali kala xwepo, eshi kwa li tava longela kumwe novaleli vakwao opo va tule moilonga omilandu doshoongalele shoLPM muDesemba.

“Ashike nee, ekwatafano letu natango ola fa ashike la ngabekwa. Onghendabala yetu yokupopya yaxuuninwa okwa li momafiku 06 Marsa pefimbo lopaliamente ya ongala kwa li,” Osho a ti ngaho.

Seibeb okwa ti okuhena ombili mongudu oshi li omalimbililo koilyo aishe yongudu.

“Unene ngaa pokati kovaleli vongudu, pefimbo opo hatu lalakanene okuyambula po omukalo welongelokumwe noukumwe mongudu,” Osho a ti ngaho.

Seibeb okwa ti ina ya kehongo lopashiwana olo la li kopaliamente shaashi okwa li e na oinakuwanifa imwe ya fimana efiku olo, okwa ti vali ina ya koshivilodalo shongudu koTsumeb nokOshivanda kokambeina shaashi okwa li a ya kepako laxekulu koKhorixas.