Oinima yoshikukuta yongushu yoN$ 600 000 ya vakwa po mOhangwena

Oshimungu shi nasha netuvikilo loinima yoshikukuta mOhangwena osha kanifa oinima yongushu i dule poN$ 600 000 omo mwa kwatelwa omandini omaadi okulya, omatalashe noshoyo oinima ikwao eshi ya vakwa momungulilo. Ovanailonga vaheyali ova mangwa po mEtitanho mekwatafano noshingwanima osho.

Omungulilo oyo mwa vakwa oinima oyo, oi li mOshikango nohai longifwa okupungula oinima oyo ya nuninwa exwepopeko longhalo yaavo va kumwa koupyakadi ngaashi wefundja nondjala. Vamwe vomovanailonga moshimungu shokupungula oinima i nasha nonghalo ya nyaipala okwa li va mangwa po nokuya modolongo yaShikango.

Omukwatakanifi womakonaakono oimbuluma moshitopolwa shaHangwena, omupedu komufala Zacharias Amakali okwa popi kutya evako ola ningwa pokati komafiku o29 Septemba nomafiku o12 Decemba.

Otaku hokololwa kutya ovafeekelwa ova ya momungulilo shihe li paveta ashike opahalo lavo nokukufa mo omakende omaadi okulya oo kwa li a nuninwa ovo ve li momumbwe yekwafo loikulya.

“Eshi Osha dimbululwa kuvavali vomovanailonga ve li vahamanho ovo tava ungaunga nopolohalama yoshikukuta melelo lopashitopolwa, pefimbo va talelapo omungulilo oyo nelalakano lokuila ko oikulya imwe,” Amakali osho a popya ngaho.

“Opwa didilikwa pwa kana omakende amwe omaadi okulya okuyelekanifa naao kwa li a nyolwa momambo,” Amakali osho a ti ngaho.

Ovanailonga ovo vavali ova dimbulula kutya omwaalu womakende omaadi okulya owa shuna pedu nonande kakwa li pa ningwa ehavaleko lasha oivike ya pita.

“Omakonaanakono opetameko aa ulika kutya ovafeekelwa otashi dulika va longifa oshipatululo shomungulilo okumona oupitilo molwaashi kape na eshi tashi ulike kutya omuvelo owa patululwa noudjuu.”

“Oukwatya woinima eyi ya vakwa po ongaashi omakende omaadi okulya e li 630 eemililita 750, oshoyo imwe ihapu, oyo kumwe yongushu yoN$ 627 270 000,” Osho a ti ngaho.

Meenghundafana noThe Namibian, omukulunhuwiliki mombelewa yelelo loshitukulwa shaHangwena, Fillipus Shikongo, okwa koleka evako loinima oyo, ashike okwaanya okutya ko sha moule, nokwa popya kutya onghee kwe lipyakidilwa nomakonaakono nouyelele otau ka yandjwa diva koikundaneki, ngee a pu.

Omunailonga mombelewa yelelo loshitukulwa, oo edina laye aanya li tumbulwe, okwa popya kutya evako loinima oyo ola didilikwa omwedi wa dja ko.

Odjokundaneki oyo oya popya kutya elelo lodoolopa inali hala okuyandja ouyelele.

“Ovanhu otava popi nale. Nena kEenhana okwa li ku na oshoongi shoshimungu osho hashi ungaunga noinima yokuxwepopaleka ondjala, nokwa li ya kundafana kombinga yevako olo,”osho odjokundaneki oyo ya popya ngaho.

Ovafeekelwa ovo ova holoka nale lwotete, momangu yamagesitrata waHangwena, mOmaandaxa.

Ovafeekelwa ava ovo nee Jeipo Hilongea (42), Nehemiah Shoovalwka (36), Miina Uukule (38), Gerry Van Wky ( 42), Fillemon Shikongo (44) naSimon Joseph (33).

Meenghundafana noThe Namibian mEtitatu, ngoloneya woshitukulwa shaHangwena, Sebastian Ndeitunga, okwa koleka evako loinima oyo nokwa popya kutya otashi udifa nai okutala kutya opu na omaumbo omayovi momikunda nomeedoolopa moshitukulwa shavo oo kwa li taa dulu okulongifa oikulya oyo ya vakwa po.

“Ovanhu ova fya ondjala, ovanhu ova pumbwa oikulya ashike [otashi fifa ounye] okutala kutya ovanambelewa vetu ovo ve lineekelelwa nova pewa oshinakuwanifa shokufila oshisho nokutukula oikulya ei inasha nonghalo yondjala otave i vake po . . ,” Osho Ndeitunga a ti ngaho.

“Oshiningwanima tashi piyaaneke unene, okulipula kutya oikulya oyo okwa li ya nuninwa ovo tava mono oixuna.

Oshiningwanima okwa li sha lopotelwa ombelewa yange okudja Kombelwa yomunashipundi waHangwena oshoyo okuza komunambelewa omukulunhu mombelewa yelelo moshitukulwa.

Ohandi koleke kutya eshi ndeshi lopotelwa, ovanhu vatanho ova hangika va mangwa po nale nopolifi okwa li ye lipyakidila nomakonaakono. Okwa li nda udanekelwa kutya otapa ningwa omalongekido taa pumbiwa opo kutwikilwe netukulo loikulya,” Osho a popya ngaho.

Ndeitunga okwa holola kutya omaumbo e li lwopo48 000 aa shangwa opo ngeno a mone oshikukuta, ashike nande ongaho omaumbo ashike e li 16 000 taa ka dula okumona shaashi kapu na oikulya ya wana.

“Kashi fi oshiholekwa kutya ovanhu ove li momumbwe yoikulya nevatelo lEpangelo. Ovanhu ova fya ondjala.”

Omaumbo shito ohaa pewa, komwedi okakutu kamwe koufila wepungu keekilohalama 12,5, ekende limwe lomaadi okulya loolita 750 neeshopa mbali, onga oikulya yOshikukuta, oyo nokuli vahapu hava nyenyeta kutya inai wana. Ashike, eedula da dja ko, omaumbo amwe moshitukulwa inaa mona sha nande oikulya yOshikukuta.Kind Regards,