Presidente wongudu yoSwapo Netumbo Nandi-Ndaitwah okwa popila etokolo longudu tai pangele, lokutunga ombelewa yayo yakula yeemiliyona onduba popepi noshipangelo shaKatutura sha kulupa mOvenduka, ta ti oimaliwa yongudu itai longifwa po eepoloyeka depangelo.
Eshi kwa li ta popi pepatululo lombelewa yakula yoSwapo Oshoondaxa, Nandi-Ndaitwah okwa ekeleshi omapopyo taa ti kutya ongudu okwa li i na okulongifa oshimaliwa osho ya longifa okutunga ombelewa mokuwapaleka oshipangelo, osho sha kala nokuulwa sha kulupa efimbo lile.
“Eshi twa tameka okutunga, ovanhu vamwe okwa li tava ti, omolwashike hatu tula oimaliwa ei metungo ponhele yokuwapaleka oshipangelo?” osho a ti ngaho.
Okwa fatulula kutya oimaliwa ei ya longifwa okutunga ombelewa yakula yongudu okwa li ya ongelwa koilyo yoSwapo nelalakano loilonga oyo, onghee itai dulu ashike okuyukifwa kepangelo ngaho.
“Oto shi kalele po ngahelipi ngee u na oilyo tai ongelele etungo lombelewa ndee oimaliwa to i yandje po? Oilyo ei nayo otai longele epangelo ndee ongovafuti voishoshela, ove shi shii kutya oishoshela yavo otai dulu okulongifwa oilonga yatya ngaho,” osho a ti ngaho.
Nandi-Ndaitwah okwa ti okuundulila oilonga yetungo komesho kakwa li tashi shiva, nande okwa li pu na vamwe mongudu navo ve li ominge nasho tete.
“Kakwa li hatu dulu okuundulila komesho oilonga yombelewa yetu.
Oilyo imwe yetu nayo okwa li i li ominge nayo, ashike ondi wete kutya atushe otwe ya kumwe ndee paife otwe lilongekida okumona etungo eli,” osho a ti ngaho.
Okwa holola yoo vali kutya etungo eli ola ya moimaliwa i dulife pwaayo kwa li ya tengenekwa, oyo a ti okwa li i li pokati keemiliyona di li N$600 noN$700.
Okwa ti omwaalu waxuuninwa owa koyelela peemiliyona di li N$900.
She likolelela kuNandi-Ndaitwah, ombelewa yakula ipe oi na eefulula di li hetatu neembelewa di li o-150.
Okwa ti etungo ola kwatela mo yoo oshaala yoyoongalele tai wana ovanhu ve li 1 500, ongulu yoikundaneki nonhele yomalinyanyudo.
Onhele yomalinyanyudo okwa ti oya lukilwa omukokoli presidente Sam Nujoma notai kala tai ifanwa Sam Nujoma Square.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
