Oimaliwa yaRebebe oya liwa komafuta

… Ovakonaakoni ova mona kutya oimaliwa oya liwa nokOmbaye

Oimaliwa ihapu yomeemiliyona mbali odo kwa li da vakwa moBank Windhoek komunailonga Nico Rebebe okwa li ya longifwa kOmbaye nokoSwakopmund.

Komufala wopolifi koshitopolwa shaKunene, James Nderura, okwa yandja ouyelele ou koThe Namibian Omaandaxa.
Okwa ti okwa tuma ko ongudu yovakonaakoni koshitopolwa oko opo i ka ninge omakonaakono kombinga youmbudi ou.

“Otwe lipyakidila natango nomakonaakono, oilyo yange imwe oi li koshitopolwa shErongo paife, unene ngaa kOmbaye noSwakopmund, shaashi oimaliwa ihapu oko kwa li ya longifwa oko.

“Otu na okuteelela ovakonaakoni vetu ve uye opo tu mu pe ouyelele uhapu kombinga yoshinima eshi,” Osho a ti ngaho.

Nderura okwa ti oshimaliwa shi fike poN$20 000 osho kwa li tashi pewa ou ta yandje ouyelele kutya Rebebe oku li peni natango opo ashike shi li.

Omupedu komufala, Paavo Iiyambo, Omaandaxa okwa ti ovanhu vatano ovo kwa li va mangwa po shi na sha noshibofa eshi ova holoka komhangu.

“Omakonaakono otaa twikile natango. Fiyo opapa, ovanhu 15, mwa kwatelwa Rebebe, ova holoka komhangu,” Osho a ti ngaho.

Rebebe okwa li a mangwa po momafiku 08 Marsa, eshi kwa li opolifi ya vakelwa ko kutya omo e li mOpuwo, e li keumbo lakakadona waye nokwa li e na edilaadilo lokuliyandja kopolifi.

Otaku tiwa okwa li a holama moAngola.

Omupedu komufala wopolifi koshitopolwa shaKavango Ushilo, Eino Nambahu, okwa ti omiliyona oshinghwanyu nhano okwa li ya hangi keembanga dovafeekelwa vatatu, omanga oN$200 000 okwa li ya hangika keembanga dovafeekelwa vakwao vatatu.

“Rebebe okwa ya kovafeekelwa vahamano, te va udanekele oilonga kofaalama, ashike shimwe shomoipumbiwa okwa li okutota ombaanga noBank Windhoek opo a kale hatu la ko eendjambi davo komwedi,” Nambahu osho a ti ngaho.

MuJanuali, opolifi oya ti Rebebe vati okwa vaka eemiliyona omafele avali koshitai shoBank Windhoek kOpuwo.
Ashike nee, omukunhuwiliki woBank Windhoek, Baronice Hans, pefimbo opo okwa ti oshimaliwa eshi sha kana kashi fike peemiliyona mbali.

Omupopiliko Bank Windhoek, Jacquiline Pack, Omaandaxa okwa koleka kutya oshimaliwa eshi sha kana kashi fike peemiliyona mbali noinashi lunduluka nande.

“Bank Windhoek ita yandje nande ouyelele kombinga yomakonaakono oo e li metifa, shaashi oshikumungu eshi oshi li momake omhangu,” Osho a ti ngaho.