Oihontali yedhipago li nyanyaleka okuna uumbanda kombinga yonkalamwenyo ye

OIHONTALI yoshiningwanima shi nyanyaleka shedhipago lyomugundjuka gwedhina Patrick Hawala Hamupanda, ngoka wo a tseyika nawa nedhina Waka, okwa popi kutya okwa adha nakusa i ikwata mothingo nokwa mono nkene a lala metope lyombinzi e na iilalo yekatana moshipala nokomaako. Hamupanda okwa mana oondjenda komatango gOsoondaha moKatutura [mOvenduka] sho taku hokololwa a ponokelwa kongundu yaalumentu mboka kwa li ya homata.

Sha landula oshiningwanima shoka, opolisi oye shi pondola okutula miipandeko aafekelwa yatano uunambo yomaafekelwa yahamano mboka kwa kolekwa taya tamanekelwa olunyala medhipago lyaHamupanda.

• 

MEtiyali, okupitila komalungula, opolisi oya pititha omathano gaafekelwa yane taya kongwa kopolisi shi na sha nedhipago osho wo eteyo lyegumbo – mekwatathano nedhipago lyaHamupanda. Aafekelwa mboka oyo Lukas ‘Big Show’ Nghishekwa, Armani ‘Stone’ Emvusi, Lukas ‘Aqua’ Andreas, Kleofas Amutenya, Festus ‘Vuxxa’ Nehemia osho wo Wilhelm ‘Lavas’ Modestus, nopolisi oya popi kutya ayehe oya tulwa nale miipandeko kakele owala kuLavas – nopethimbo onzonkundaneki ndjika ya tuminwa koshinyanyangidho ohela, Lavas ina tulwa natango miipandeko.

Pethimbo opolisi ya tseyitha olukongo lwaalumentu mboka oya gandja elondodho lya yaga kegonga kutya oya nika oshiponga nonkene oshigwana inashi pumbwa okuya shonga, notaku hokololwa kutya oye na nale iipotha yilwe. Onzonkundaneki ndjika oyeshi pondola okuya moonkundathana noihontali ngoka a li poshiningwanima shoka shedhipago lyaHamupanda, nokwa popi kutya ngashingeyi okuwete onkalamwenyo ye yi li moshiponga.

Omukiintu ngoka okwa hokolola kutya oshiningwanima shoka osha ningilwa pehala lyokuthitha oondunda tali adhika mepandaanda lyedhina Mungunda Street moKatutura, nokwa li ta zi mondunda ye sho a mono omulumentu a homata ondjembo ta zi mondunda yokulala moka mwa li Hamupanda. “Olutu lwandje olwa kukuta molwashoka momukala onda adha mo aalumentu yane, omanga ye li yaali oya adhika ye li mondunda yanakusa – mboka gumwe okwa li nondjembo nomukwawo okwa li nekatana. Oya li taya popi mOshiwambo nonkene kanda li ndi uvite shoka taya ti molwashoka ihandi uvu elaka ndyoka. Ashike pethimbo ndyoka okwa li ngaa ndu uvite sho ti igidha edhina lyandje, naasho ndayi mondunda moka onda adha i ikwata mothingo nondiwete kutya omo a yahwa nokwa li wo e na iilalo yekatana moshipala nokomaako agehe,” osho oihontali a hokolola ngaaka. Pauyelele wolopota yopolisi, Hamupanda ngoka e na omimvo 31, okwa tetwagulwa nokwa yahwa kaafekelwa kaayeshiwike sha ningwa mOsoondaha megumbo lyi li moKatutura. Hamupanda okwa ponokelwa kaafekelwa mboka kwa li ya homata ombistoli osho wo ekatana. Aafekelwa otaku hokololwa pegumbo ndyoka ye ya po taya kongo mwene gwotuukala yoPolo Vivo ndjoka kwa li ya thikamekwa molugumbo, pethimbo ndyoka. Otaku hokololwa kutya sho ya yi megumbo ndyoka oya tameke okuhadha oondunda adhihe dhokulala sigo yi itsu Hamupanda e li mu yimwe yomoondunda ndhoka. Okuza mpoka otaku hokololwa oontamanana dha tamake, nolwanima Hamupanda okwa tsuwa nokuyahwa. Opolisi pethimbo ndyoka oya tseyitha kutya aafekelwa oya fadhukapo notuukala ombulawu yedhina Citroën. Pauyelele wa gandjwa, aalumentu mboka ayehe [mwa kwatelwa Hamupanda] okwa li ya ningi ompangela yeyugo ashike inashi enda we nawa.

“Waka okwa li ha tilika [naafekelwa] okwa li yeshiwike nawa nomadhina Lovers osho wo Big Show Boys yomoHakahana, naHamupanda oye kwa li omuhona gwawo,” osho onzonkundandeki ndjika ya lombwela ngaaka. MOmaandaha, omupopiliko gwopolisi yaKhomas, Silas Shipandeni okwa koleke kutya oyi ipyakidhila nomakonakono gedhipago lyaHamupanda, ashike okwa tindi okupopya muule kombinga yoshipotha shoka.

“Ngele otu pula kombinga yetulo miipandeko shoka inandi shi nongela, ashike otandi ka konga uuyelele ngame ndi ku galukile,” osho a popi ngaaka.

Pauyelele wopolisi otaku hokololwa kutya Hamupanda okwa kala ha kwatwa po kopolisi mekwatathano niiningwanima yimwe mbyoka a kala ha longo. Kuume kaHamupanda, ngoka a tindi edhina lye li tumbulwe, okwa popi kutya oonakumudhipaga okwa li ya shilipaleke kutya itaye mu thigi nomwenyo. “Oto ka yaha ngiini omuntu ngoye eto mu tete ishewe osho wo oku mu tsa?” osho kuume ke a pula ngaaka. Hamupanda okwa yambukile kOkalongo moshitopolwa shaMusati, naapambele ye oya tseyithilwa nale onkundana yoluhodhi. Aafekelwa mboka oya holoka ohela mOmpangu yaMangestrata gwaKatutura mOvenduka, noshipotha shawo oshu undulilwa komasiku 28 Septemba noya pewa ompito yokukonga aakalelipo yawo yopaveta. Aafekelwa ayehe oya shunwa mondjeedhililo.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.