Ohangwena otai pula komesho nawa neyandjo lomayakulo

Oshitopolwahoololo shaHangwena otashi pula komesho nawa mokuyandja omayakulo a fimana ngaashi omatungo ehongo, eendjila nomayakulo omeva, nande opu na omikundu da kundukinda ekongo loipumbiwa yepangelo netulomoilonga la ngabekwa tali twikile okweendifa kashona eepoloyeka dakula da yooloka.

Ngoloneya wOhangwena Kadiva Hamutumwa, okwa ti eshi osha kwatela mo eesekondele di li heyali dipe ongombinga yeenghendabala dokwaandjakaneka ehongo, ashike okwa londwela kutya eengulu dofikola inadi wana natango odi li omukundu wakula.

Hamutumwa, oshinima eshi okwe shi holola pefimbo letalelepo laye keumbo lapresidente mukulu Hifikepunye Pohamba kOkanghudi Olomakaya, olo kwa li la kwatelwa komesho kupresidente Netumbo Nandi-Ndaitwah.

Presidente mukulu Nangolo Mbumba naye omo a li mosheendo.

Okwa ti kutya nande eyokomesho otali holola onghatu ya fimana mokuyambula po ehongo, natango opu na omumbwe yeengulu dofikola da wedwa po opo di yakule omwaalu wounona oo tau ningi uhapu.

Okwa weda po kutya oilonga yokutunga osekondele kOngula ya Netanga moshikandjohoololo shaMulonga oya teelelika i tameke, omanga oVision School mEpembe ya kwatelwa momutengenekwafaneko woneudo.

“Kombinga yomatungo elelo, omafaneko ombelewa yangoloneya mEenhana ee li pondodo yopombada, nedu ola yandjwa nale noshimaliwa opo shi li.

Ashike nee, opoloyeka yombelewa yakula yewiliko loshitopolwahoololo oya fikama molwomakateko okukonga oipumbiwa, osho sha eta oshimaliwa shi shunifwe koshikefa shepangelo,” osho a ti ngaho.

Kombinga yeendjila, ngoneya okwa ti oilonga yondjila oyo ya dja kOndobe ya yuka kEenhana oi li metifa, omanga oilonga yondjila ya dja kOushake ya yuka kOkankolo ya tengenekwa i tameke omwedi ou.

Ondjila yomamanya oyo ya dja kOmulondo ya yuka kOshuuli oya pwa, nande efundja otali twikile nokupiyaaneka eendjila da yuka keefikola nokeenhele odo di na omayakulo a fimana.

Hamutumwa natanga okwa holola kutya eemboola dihapu natango ihadi longifwa molwoshimongwa.

Okwa lombwela vali engafifi kutya ouministili wounamapya nounaimu owa tameka nopoloyeka younamapya nounaimuna kEkoka, noya tulwa nale odalate.

Okwa yandjwa yoo oshimaliwa shokuningifa omalolelokonakono.

Eenghendabala dokuyambula po eenghalo dovanhu odi li metifa nomayandjo omayakulo momalukanda, nolukanda kOngha olo tali talwa tete okupewa omayakulo amuni, mwa kwatelwa omeva, oundjuwo neendjila, opo li tulwe pondodo yodoolopa, osho a xulifa ngaho. – NAMPA

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.