Ohandi ka djuulukwa okudanena oChrismasnomudo mu pe pamwe naGeingob

Pelesidente Nangolo Mbumba , okwa ti ota ka djuulukwa okudana oChrismas nomudo mu pe pamwe naGeingob, oo efyo laye petameko lomwedi ou le mu ehameka neenghono omolwooukame wavo wopofingo.

Eshi okwe shi popya pefimbo eshi kwa li ta pulwaapulwa kehangono lokwaandjakaneka omawi momhepo o-NBC, Oshoondaxa.

Oukaume waMbumba naGeingob owa tameka eshi kwa li va shakena lwotete koNew York mo1967. Mo1964, Geingob okwa li a hoololwa opo a ninge omukalelipo woSwapo koiwana yahangana nokoAmerica.

Okwa longa onga omukalelipo fiyo 1971.

Okwa kala nokweenda noilongo yAmerica. Konima yefimbo omutumba wopombada woiwana ya hangana owa fimaneka omukalelipo woSwapo nomunhu oo a kalela po ovaNamiba.

Oukaume, Mbumba okwa ti, owa nghonopalekwa mokati keedula omo eshi kwa li tava lwile emhanguluko laNamibia navakwao vamwe ovo va li kombada. Eshi osha eta eenghalamwenyo davo kumwe shaashi ova kala hava longo pamwe, mopolotika, mepangelo, nomofamili yoo.
Pelesidente Mbumba okwa ti efyo laGeingob oli djuu unene.

“Otashi vele nge unene shaashi itandi shiivifa efyo lomunhu umwe, ashike otwa kanifa omutwe woshilongo, otwa kanifa mbushe moilonga, otwa kanifa kaume ketu. Nondi na okushininga shaashi paife osha ninga oilonga yange. Okwa li tashi luluma unene okumumona e li pee, ndee ondokotola otava ti otwe mu kanifa… efimbo li djuu nai nai.

“Ondi na okutwikila nokulipula efyo laye omanga ngaa ndi na oilonga ei nomonghalamwenyo yange aishe,” Mbumba osho a ti ngaho. Mbumba okwa hokolola Geingob ta ti okaume kaye kopofingo, e mu lineekela yee omumwainamati.

“Ohandi ka djuulukwa okuya keumbo laye,Casa Rosalia, nda shifwa ile inandi shifwa, hatu danene oChrismas ile omudo mu pe pamwe. Okwa li nda tekulwa kumeme Hendrina Thomas, meme mumwaina waina yaGeingob. Okwa li omeme wange ngaashi ashike a li meme waGeingob nonda kala handi popi poivilo yofamili yavo ponhele yaGeingob.

Mbumba okwa kendabala oikando i hapu opo a fiye po oilonga yepangelo, ashike nakufya pelesidente iteshi pitike osho.

Okwa hokolola eshi Geingob kwa li a ulikwa a ninge omukulunhuwiliki womahoololo mo1989, okwa li a hoololwa onga omuyandjimayele mombelewa imwe nokwa kala ha i a ka longe peenhele dihapu onga ominista, okudja kounamapya nounaimuna, koimaliwa nokehongo. Mbumba okwa dana onghandangala pefimbo lokambaina yaGeingob opo a ninge omuulikwa pelesidente woSwapo mo2012, nokonima okwa ninga hamushangandjai woSwapo nokwa ka ninga omupedu pelesidente woshilongo.

Mbumba okwa ya pombada onga omupesidente woshilongo mo04 Febuali konima yefyo laGeingob.

“Geingob ke na fiku e kuulike u ye ponhele yonhumba melelo medina loukaume weni naye. Aaye. Hasho kwa li e li ngaho. Ou na okulonga oilonga yoye nawa,” Mbumba osho a ti ngaho.

‘ONDA TEELELA NELINEEKELO’

Oukaume wavo wopofingo ita udulu okuningwa pehe na kaume kavo Peter Katjavivi, omunashipundi meumbo lopashiwana.

Katjavivi ou natango ta lili efyo lomukulukadi waye Jane Katjavivi muAguste 2022, natango okwa kanifa vali kaume kaye. “Ovanhu, ookaume kange, Geingob nomupelesidente mu pe, otwa tulwa monghalo imwe notashi hekeleke okukala u na ovanhu ovo tava lili pamwe naave, ohashi shi ningi shi pu kashona,” Katjavivi osho a ti ngaho.

Okwa shakeneka Geingob koAgustineum High School, oko Geingob kwa li te lideula onga omuhongi.

Ookaume aveshe okwa li oomakula shaashi ova dalwa odula imwe 1941. “Ohandi ka djuulukwa eemangela odo kwa li tu na, nghee hatu talelafana po, tu li omutumba twa mwena, hatu litulile mo omadilaadilo, hatu talele po enhele dimwe di kulu oko kwa li hatu di shee hatu talele po ookaume ketu va kulu, shee hatu vatele ounona vetu noutekulu vetu opo va shiivafane nawa shee hatu va vatele opo vakwatafane opo va dule okupandula osho twa kendabala tu ninge,” Katjavivi osho a ti ngaho.