Ohamba yOkongandjera ya hala i futwe eemiliyona N$15

Ohamba yaNgandjera Johannes Mupiya otai ningi omatilifo kutya otai katukile ehangano lokuyambula po ovalaule ongahatu yopaveta ngee inali mu futa oshimalwa shi fike peemiliyona N$15.

Oshimaliwa eshi okwa li shi li ombinga yetokolo lavo olo la eta opo ehangano loHeineken li lande po ehangano ledina Ohltaver & List (O&L) Group kehangano olo hali dungu eebiila laNamibia.

Heineken okwa mona oshipambuliko shee pelesenda 50,01 kehangano olo hali dungu eebiila laNamibia koshimaliwa shi fike peebiliyona N$5,4 odula ya dja ko. Umwe womwaavo ve na mo omauwa moshinima omu, ehangano loEpia Investment Holdings, ongeshefa yovanageshefa va kula, ngaashi nakufya Aron Mushimba. Epia Investment Holdings okwa li e na mo eepelesenda 49 mombuulaye nokwa mona ko omauwa koHeineken. Paife,ohamba yaNgandjera oya hala i futwe eemiliyona N$15.

Eshi okwe shi pula momukanda oo a shangela koEpia Investments okupitila muhaende waye, Apollos Shimakeleni.

Momukanda omo, Mupiya okwa ti okuna mosha moshimaliwa ongaombinga yefyuululo laxekulu, nakufay ohamba yOngandjera Jafet Munkundi, oo kwa li e na mo eepelesenda 14,28 muTuakondjeni Investments, oshitai ngeshefa shoEpia Investments.

“Mo2023, O&L okwa landifa po oipambuliko yaye ya kula kuHeineken oyo ya li kumbuulaye. Osho sha eta Epia a landife po oipambuliko yaye natango kuO&L.

“Eshi osha hala kutya oiyemo yaEpia okwa li ya kula modula yo2023, nomunhu wetu okwa li a pumbwa okumona ko oshimaliwa shi fike peemiliyona N$15,” Shimakeleni osho a ti ngaho.

Shimakeleni okwa ti vali Mupiya okwa li a kumwa unene eshi a uda kutya ehangano okwa li la hala okufuta oshimaliwa kuMunkundi, ponhele yokumufuta.

“Epia okwa li a ya komunhu wetu, ndele te mu lombwele opo a kufe ombinga moshinima sheyambulepo, osho omunhu wetu a itavela. Onga shi li ombinga yeudafano, omunhu wetu okwa kala ha mono oifuta tai di koEpia okudja 2013 fiyo onena” Shimakeleni osho a ti ngaho.

‘EEMBAPILA DEANO’

Eembapila otadi ulike kutya Mupiya okwa li a futwa omiliyona N$1,3 okudja moshimaliwa oshoipambuliko yaMunkundi oyo ya li muTuakondjeni Investments okudja muSeptemba 2013 fiyo Septemba 2022.