Ohamba yaNdonga Tatekulu Fillemon Nangolo okwa ti okulonga oihakautu otaku popilwa opo ku longwe oikulya ya wana, unene ngaa momaumbo opo ku shonopekwe okukala ashike kwa talwa moikulya oyo tai di kondje yoshilongo.
Okwa ti oihakautu otai dulu okukulila mo epungu, unene ngaa kovanafaalama vashona, nohai eta oiyemo meendelelo.
Oshinima eshi okwe shi popya pefimbo lokulikola oihakautu koproyeka yohamba kOkashana moshitopolwahoololo shaShikoto Olomakaya.
“Otu na edu la wana konooli nolakula nawa nokulonga oikulya yetu vene.
Itatu kala ashike hatu longo omahangu noilyavala mangha hatu dulu okulonga oinima ngaashi epungu, omatama neenyanga.
Ohatu dulu ashike okuungaunga noshikumungu shoikulya inai wana ngee otwa tameke okulonga atushe ndee hatu shakeneke epangelo,” osho a ti ngaho. Nangolo okwa ti oihakautu otai endelele okupingena po oinima oyo hai liwa momaumbo ngaashi, olwishi noilyavala.
Pakuweda po, ovanhu vahapu ova ,ona kutya oihakautu oipu nokulongekida nokuteleka taku longifwa oinyenyepeki ihapu ya yooloka.
Oshilyo shopaliamente Job Amupanda okwa ti oproyeka yohamba yoihakautu oyo yotete konooli, ta ti vali oproyeka otai lalakanene okukandula po omukundu woikulya inai wana nokuhena oilonga kwovanyasha.
“Eshi oshinima shotete okuningwa monooli. Ohamba oya ti natu longe oikulya yetu vene ndee ota kwatele oshiwana komesho mokuninga oshinima osho.
Ongoshiwana, natu kale hatu dulu okulonga oikulya yetu vene ndee hatu efa oinima ei yokukala hatu lande keshe shimwe kondje yoshilongo.
Eshi okwa li ashike etameko ndee oshi na okweenda tashi ningi shakula shi dulife po apa, eshi efimbo la yuka komesho,” osho a ti ngaho.
Okwa weda po kutya oshiwana otashi dulu ashike okuya komesho ngee osha tameke okulonga oikulya yasho vene ndee tashi xulifa po okulikolelela mokulanda oikulya kondje yoshilongo.
Momudo 2024, Nangolo okwa li a yandja eehecta dedu di li 54 dounafaalama kovanhu vonhumba kOkashana opo li longifwe okulonga oikulya.
Amupanda oye umwe womwaavo va mona omauwa aa.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
