“Ovanaipupulu, ovanaipupulu! Onda kala po eedula 24 apa, ndee kapu na nande osheshi sha ningwa po,” Omunhu umwe oo hadi kolukanda ledina Mix osho a ti ngaho pefimbo Tobie Aupindi oshilyo shongudumutima yoSwapo kwa li ta popifa ovanhu vokoMix mexuliloshivike.
Aupindi okwa udanekela ovakwashiwana wokoMix exumo komesho nomayakulo oshiwana.
Olukanda ola pumbwa oundjuwo voshiwana, eenhele dokudanaukila dounona, omatala okulandifila noshaala yoshiwana.
“Ngeenge hatu popi eyambulepo loshiwana, kaleni ashike mushi shi kutya ohatu shi ningi. Itatu ningi omashendjo. Otwa ninga etokolo kutya otapu ka kala eyambulepo loshiwana apa,” Osho a lombwela ongudu yovanhu ve li lwopo50 ngaho.
Aupindi okwa lombwela ovakwashiwana kutya Swapo okwa pa oumbashu vavo eenomola.
“Endjila oda fanekwa. Onda lombwelwa kutya opu na opolohalama yofikola ya tulwa moilonga.
Otapu ka kala puna nomindilo domeendjila, mwa kwatelwa omeva nolusheno loshiwana. Kashi shi shoshili osho? Nokapangelo.
“Paife omu na okapangelo kopokafimbo. Opu na nale ondunge yopombada opo kutungwe okapangelo. Ngee hatu popi kombinga yexumokomesho loshiwana, opu na ovaliningifi, po ope na Swapo ou e na nale exumokomesho loshiwana,” Osho a ti ngaho.
Ashike nee, omukwashiwana umwe okwe shi anya, ndee ta pulwa opo a fiye po oshoongalele, ashike okwaanya ndee ta denge omuunganeki woSwapo, Bonifatius Munango, moshitopolwa nenghava.
Omukwashiwana ou okwa li a handuka eshi ngoloneya woshitopolwa shaKhomas Laura Mcleod-Katjirua kwa li a mona omhito yokupopifa oshoongalele.
‘OIMBULUMA HAYO ENYAMUKULO’
Omundjadjukununi woikwapolotika Ndumba Kakwanyah okwa ti oimbuluma hayo enyamukulo ashike Ovanamibia ova loloka onghalo youxupilo yavo oyo ya naipala.
Okwa kunghilila kutya oinima i li ngaha otai dulu vali okukaningwa pamwe pe lili moshilongo.
“Osho otashi ulike omaudaneko inaa wanifwa po oo haa ningwa kovanapolotika, kashi shi ashike Swapo. Swapo shaashi oye ongudu tai pangele, ovanhu ove i handukila unene shaashi itai yandje omayakulo,” Osho a ti ngaho.
Omundjadjukununi okwa ti eengudu dopolotika nadi kale hadi wa nifa po omaudeneko oo da ningila ovanhu pefimbo lomahoololo.
“Ashike nee eshi sha nyika oshiponga osheshi kutya ohava ningi omaudaneko pefimbo leekambaina domahoololo, ashike ihava i ko vali kovanhu ovo opo va ka popye kutya ova fikama peni ile ova taalela omaupyakadi ashike.
“Ova teelela eekambaina domahoololo a shikula ko va ka ninge omaudaneko amwe vali,” Kwamwanyah osho a ti ngaho.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
