Nujoma a kondema oondjokana dhomashenge

Omukokoli gwoshilongo Sam Nujoma okwa kondema oondjokana dhaantu yoludhi lumwe paukashikekookantu, nokwa popi kutya onkalo ndjoka “omithigululwakalo dhaakwiilongo ndhoka tadhi tulwa mutse”.

Nujoma ndhoka okwe dhi popi pethimbo lyoshituthi shomagongo shoka sha ningilwa momukunda Ohamautsi moshitopolwa shaMusati, mOlyomakaya.

“Onda hala okuwaimina omalelo gopamuthigululwakalo gahetatu gomonooli yoshilongo osho wo Aanamibia oyendji mboka taya kondema oshinima shoondjokana dhaantu yoludhi lumwe paukashikekookantu shoka tashi etwa moshilongo shetu,” osho Nujoma a popi ngaaka, okupitila moshipopiwa she shoka sha leshwa peha lye kukansela gwoshikandjohogololo shaRuacana, Andreas Shintama.

Nujoma okwa popi kutya ota tsu kumwe nomunashipundi gwomalelo gopamuthigululwakalo, elenga Immanuel /Gâseb ngoka omasiku ga zi ko a popi kutya Namibia inali mangululwa nomalalakano gokwe eta emanguluko lyoondjokana dhaantu yoludhi lumwe paukashikekookantu.

Okwi indile aaleli yopamuthigululwakalo ya tsikile nokuhwahwameka omithigululwakalo nokukaleka po omilandu dhu uka dhopamuthigululwakalo opo ashike kukondopekwe oshigwana.

“Onda hala okwi indila Aanamibia ayehe osho wo Aafrica ayehe ya kale ya kotokela iinima yopakwiilongo, oonkalo dhopakwiilongo ndhoka tadhi etwa oku tu nwetha mo nonande odhi li ompinge yomithigululwakalo dhetu dhopashiAfrica,” osho a popi ngaaka.

Hasho oshikando shotango Nujoma ta kondema ekwatathano yopaihole lyaantu yoludhi lumwe paukashikekookantu. Mo2001, Nujoma okwa li a gandja elombwelo kopolisi opo yi tule miipandeko aantu yoludhi lumwe paukashikekookantu, ya shunithwe kiilongo yawo nenge ya tulwe mondholongo molwashoka ekwatathano lyopaihole lyaantu yoludhi lumwe paukashikekookantu inali pitikwa moNamibia.

“Namibia ina pitika ekwatathano lyopaihole lyaantu yoludhi lumbwe paukashikekookantu. Opolisi oya lombwelwa yi mu kwate po, yi mu shune kiilongo yeni nenge ye mu tule mondholongo,” osho Nujoma a popi ngaaka pethimbo ta lombwele aailongi yoshiputudhilo dhaUnam, mo2001.

Omasiku ga zi ko Ompangu yoPombandambanda oya gandja elombwelo kepangelo li taambe ko oondjokana dhomashenge nenge aantu yoludhi lumwe paukashikekookantu mboka ya hokanena pondje yoshilongo yo ya kale taya tyapula omauwanawa agehe ngoka ge niwe kaantu ayehe mboka ya hokanathana.

Pokati mpoka, mEtitano lya zi ko oongundu ndhoka dhi li ompinge noondjokana dhaantu yoludhi lumwe paukashikekookantu odha ningi omahololomadhiladhilo miitopolwa ya yooloka moshilongo, okukondema emanguluko lyuuthemba womashenge moshilongo.