Omuprima minista mukulu Nahas Angula okwa popila oshikako shomukulunhuwiliki wokomisi yokulwifa oulingilingi yaNamibia yedina Anti-Corruption Commission Paulus Noa, ta ti nande opwa kala omikundu, omukulunhuwiliki woACC nongudu yaye ova kala tava longo ngaashi tava dulu okukelela oulingilingi.
Oshinima eshi osha landula eembedi okudja koshiwana nokovanapolitika kutya euliko lomukulunhu woACC nali talululwe nokukala la ningwa pauyelele.
Vamwe ova itavela kutya Noa ke na eshi a ninga po a lwife oulingilingi.
Okwa li a ulikwa pefimbo laAngula a li omuprima minista, ndee oshikako shaye osha teelelika shi uye pexulilo muJune.
Angula okwa ti okatendo koACC oka yelifa nawa omilandu dokukuta ndee ta tofa mo kutya oku na okuningwa ngahelipi, onghee nee naka shikulwe ngaashi shi na okukala.
“Ombelewa yokulwifa oulingilingi kai pu. Noa nongudu yaye ova kala nokuninga osho tava dulu, pakutala koudjuu wombelewa oyo,” osho a ti ngaho, ta weda po kutya omikundu edi oda pumbwa eyambidido lovakwashiwana mokulwifa oulingilingi.
Omundjadjukununi woikwapolitika Ndumba Kamwanya okwa pula omuleli a kale ehe na olwaamambinga opo a mone vali elineekelo loshiwana ndee ta longo a manguluka ehe na nande omaxwaxwameko opapolitika.
“Omuleli woACC ta shikula ko na kale e lifikamena, a pama noku na ehalo lokulonga ehe na olwaamambinga.
Okomisi oya pumbwa omuleli oo taa lula elineekelo loshiwana nokuulika okupitila mpoilonga kutya kapu na omunhu e dule oveta, kutya nee owondodo ilipipo mopolitika ile exwaxwameko,” osho a ti ngaho.
Kamwanya okwa popya kombinga yokukuta pauyelele, ta ti ngeno nakuningwe oukonaakono moshiwana opo eekandidate di ulike omaliudo ado e li ominge noulingilingi kOvanamibia, ta ti elongo lopauyelele otali vatele okutunga elineekelo mokuninga ehoololo.
“Okomisi nai konge omuleli ehe na nande ekwatafano lasha lopapolitika nondjokonona yohokwe yokuyakula ongudu,” osho a ti ngaho.
Nande okwa tambula ko eenghendabala daNoa mehangano eli, okwa ti opu na omalimbililo kutya oulingilingi wa kwatela mo ovanamadina kakwa li wa ungaungwa nawo sha wana pefimbo laye.
Kamwanyah okwa popya kombinga yomumbwe yokunghonopeka ACC neenghono dopombada dokutamaneka opo ku kale taku ningwa omakonakono opamufika oo taa eta ekalelepo loinima.
Omunapaliamente mukulu Joseph Kauandenge okwa endulula omapopyo aKamwanyah, ta ti inashi yuka nawa presidente a kale e na eenghono adishe dokuulika omukulunhuwiliki woACC.
“Eshi inashi fimaneka nawa okutala ngeee omunhu ota dulu ngaa nelongo lopauyelele olo la teelelika meuliko lomukulunhuwiliki woACC,” osho a ti ngaho.
Okwa ti ombelewa yoACC oya kala nokudanenwa fiyo nokuli opondodo opo ya kala nokulongifwa okupotokonona oinima yopolitika yopaumwene mokati koungudu va yooloka, omangha tai dopa okutamaneka ovanhu vonhumba tava lundililwa oulingilingi.
Kauandenge okwa yandja omayele ngeno opo keshe omunhu e li pondodo oyo a ningilwe omakonakono onghalamwenyo nopaliamente i kale i na eenghono nai va pule omapulo opo va yandje omanyamukulo noinima tai limbililike okudja moilonga yavo, osho tashi ka amena oshiwana shihapu osho tashi mono oixuna.
Noa okwa wilika oACC okudja momudo 2006 fiyo Desemba 2020, ndee ta wedelwa ko oulwe weemwedi hamano kupresidente Hage Geingob, nande okwa li tashi anywa.
Momudo 2021, Geingob okwa ulikulula Noa a twilikile oule womido nhano, osho sha eta wilike ehangano eli oule womido 20.
–NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
