Omukulunhuwiliki mukulu wOkomisi yOkulwifa Oulingilingi Paulus Noa okwa indila omulanduli waye, Bryan Eiseb, a yambule po oveta nokukala a pama a hawililwe po komapopyo oshiwana noopapolitika ndee ta amene oushili wehangano.
Eshi kwa li ta popi noNampa Omaandaxa kombinga yelunduluko lelelo, Noa okwa ti Eiseb na nghonopeke oveta puhe na okunwefwa mo koohandimwe ovo va hala omavatelo ehe li pamulandu woveta.
“Ondi udite kutya Bryan Eiseb ota dulu. Omayele ange oyaa kutya, moilonga yaye, na nghonopeke oveta ndee ina efa a nwefwe mo koohandimwe ovo va hala okumona ta holola omautanga nande ita landula oveta,” Noa ta ti.
Okwa londwela kutya omaliudo oshiwana inee lidopa momatokolo omakonakono.
“Ina pitika omaliudo oshiwana e mu nwefe mo a kufe omatoko a puka, a hafife ashike oshiwana. Vamwe ohave ya noinima yavo yopaumwene noinima yopapolitika.
Ina pwilikina nande koinima oyo,” Noa ta ti. Noa okwa lombwela yo omulanduli waye opo a kale “omulididimiki”, ta ti omhito ei ohai ya nokulikalela, okupewa omaushima nomikundu dihapu dopaumwene.
“Okuwilika Okomisi yOkulwifa Oulingilingi, mupya munene, oshinima shi na edjadja, sha nyika oshiponga, ou na ashike ookaume vashona novapanguli vahapu.
Ne lididimikile ashike omudingono wa tya ngaho ndee ta yakula oshiwana,” osho a ti ngaho.
Noa okwa ti okomisi oya tambulwa ko paunyuni okupitila mekufombinga layo lokulwifa oulingilingi, nokunghonopeka elongelokumwe nomahangano akwao okulwifa oulingilingi.
Okwa ti oulingilingi owa ninga uhapu neenghono, noumbudi woimaliwa nomaungoba oshinanena taa pingene po omikalo dikulu.
Noa okwa popya kutya oshilongo osha pumbwa eeveta da pama, mwa kwatelwa eeveta doimbuluma yokomalungula nomalunduluko mOkatendo kOkulwifa Oulingilingi opo okuliyambapaleka ku ningwe oshimbuluma nokupameka eenghono dokomisi dokukonakona.
Ashike nande ongaho, Eiseb okwa anya okutya sha shaashi omulandu wokuulika inau manifwa fiyo okeluwa eli.
“Tangi unene, ashike ohandi ti sha ashike ngee omulandu aushe wa pu, nde lineekela moule womafiku atatu twa yuka,” osho a lombwela Nampa ngaho.
-Nampa
