‘Nkene nda fadhukapo TB Josua’

Jessica Kaimu

OMUTOOLINKUNDANA gwokoTV, Jessica Kaimu, ngoka a dhana onkandangala omasiku ngaka sho taku hokololwa a zi mokalungu kutya okwa kala ta monithwa iihuna nokukwatwonkonga komusita ngoka a tseyika nawa muuyuni Temitope Balogun (TB) Joshua, okwa hokolola nkene i iyadha e li mongeleka ndjoka nonkene e shi pondola oku yi thiga po.

Kaimu ndhoka okwe dhi hokolola kopolohalama yoshiputudhilo shaUnam tayi ithanwa TedX muDesemba, konima owala yiiwike iishona manga onzonkundaneki yoBBC inaayi pititha omakonakono ngoka ya ningi kombinga yaTB Josua sho a kala ta kwatonkonga mboka ya kala kongeleka ye koNigeria ‘ongaalongwa ye’.

Kaimu gumwe gwomongundu yaakiintu ya konda po25 mboka ya hokolola kutya oya monithwa iihuna kunakusa TB Josua, ngoka oye mwene gwoshinagoga tashi ithanwa Synagogue Church of All Nations (Scoan), ongeleka onene yoshiKriste ndjoka wo yi na oradio yomuzizimba yedhina Emmanuel TV.

Sho a pulwa konzonkundaneki ndjika kombinga yoshiningwanima shoka, Kaimu okwa lombwele oThe Namibian yi pula uuyelele kombinga yehokololo ndyoka komukalelipo gwe ngoka e li moUK, ashike nando ongaaka omukalelipo gwe ngoka ina yamukula omapulo a pulwa lwoshikando oshitiyali, oshiwike shika.

Kaimu okuli oshitopolwa shehokololo ndyoka lya pitithwa kombinga yaTB Josua, ngoka a mana oondjenda mo2021, ongomusita ngoka a li ha hepeke aantu nokuya momilalo naakwanegongalo ‘ongaalongwa ye’.

Onzonkundaneki yoBBC oya kala tayi ningi omakonakono kombinga yaTB Josua uule woomvula mbali konima sho a mana oondjenda, noya lombwelwa omahokololo kwaamboka ya kala iihakanwa ye.

Okupitila mopolohalama yaUnam yoTedX, Kaimu okwa hokolola kutya muule woomimvo e li mongeleka ndjoka, okwe yi thigi po e na uupyakadhi wuundjolowele wethindakano lyopamadhiladhilo.

“Inandi tyapula ethimbo lyandje lyokuunona ngaashi shi na okukala. Kanda li nande tandi vulu nondi iyadha nda kwatwa kethindakano lyopamadhiladhilo,” osho a popi ngaaka.

Moonkambadhala dhokukwathela Kaimu, aavali ye oya kongo ekwatho.

Okwa hokolola kutya kaya li we nande ye na uuthemba wokumona omikanda dhawo dhomalweendo osho wo oongodhi dhopeke shila oongele ya pewa epitikilo.

“Katwa li nande twa manguluka,” osho a popi ngaaka.

Ondjila yaKaimu okumona emanguluko oya tameke sho a ningi kuume gwomuNigeria ngoka wo naye a li ‘omulongwa’ gwomongeleka ndjoka.

“Okwa li sha fa ehala ewanawa hoka nda tseya nokwiiyuva ngame mwene. Onda li nda hala okuya [kegumbo],”osho a popi ngaaka.

Okwa popi kutya opo ashike a mone ompito yokukwatathana naakwanezimo ye, okwa li e na okuya koshimpungu shokuyakula oongodhi dhomagalikano mongeleka.

“Onkene onda longa nuudhiginini, onda tete ko omafufu gandje. Onda ningi omwiinayi ngaashi kwa li a hala ndi kale, nonde ethwa kashona. Nolwanima okwa pendje onkatu yokuwilika oongodhi ndhoka tadhi dhengelwa mo. Naampoka onda kala ndi na ompito nawa yokudhenga ongodhi,” osho a popi ngaaka.

Kaimu okwa popi kutya okwa li a longitha ethimbo lyolusheno ndoka kwa li lwa gu ko opo a vule okudhengela aavali ye.

“Onda dhengele aavali yandje nonde ya lombwele shoka tatu ningilwa mongeleka nondeya tseyithile kutya onda hala okuza ko ndi galukile kegumbo,” osho a yelitha.

“Onda lombwele meme, tate kutya tumeni oemail kongeleka kutya meme gwandje ote ehama nonda pumbwa okugalukila kegumbo opo ndi mu laleke lwa hugunina,” osho a yelitha ngaaka.

Ompangela ye ndjoka oye shi pondola, molwashoka konima owala yomasiku gatatu okwi ithanwa mombelewa yaJoshua.

Kaimu okwa thindikilwa kaapolisi yahamano.

“Otwa thiki pokapale koondhila, nonda londo ondhila, momasiku 14 Kotoba 2013, nonda galukile koNamibia. Okwa li ndu uvite nda manguluka, ashike nando ongaaka okwa li nda tila noonkondo,” osho a popi ngaaka.

Kaimu okwa popi kutya okuza mpoka okwa tameke e na omandhindhiliko gethindakano lyomadhiladhilo kombinga yonkalo moka a li.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!