Omuprima minista Elijah Ngurare okwa ka tuka onghatu yokukundafana novangeshefa va ‘Order With Me’ eshi epangelo tali kendabala okumona omukalo uwa nomudingonoko wa kwatela mo mukalo ou wokungeshefa tau hapupala paife.
Eshi osha landula etalelepo inali teelelwa laNgurare koministeli yoimaliwa, oko kwa li a ninga oshoongalele naminista Ericah Shafudah nomukulunhu wehangano lokwoongela oishoshela ledina Namibia Revenue Agency (NamRA), Sam Shivute.
Eenghundafana oda li kombinga yokutofa mo omikalo di li xwepo dokuyambidida nokutambula ko oshikondo ‘shaOrder With Me’ shopangeshefa, osho sha ninga shihapu paife mokati kovanyasha Ovanamibia tava longifa omalungula va lande nokulandifa oinima yavo.
“Epangelo ole litula mo mokukwashilipaleka kutya ovanangeshefa vashona inava patelwa kondje moshikumungu shelunduluko leliko loshilongo,” osho a ti ngaho.
Okwa holola yoo vali omafaneko okushakeneka ovanangeshefa mOvenduka momafiku tee ya opo a ude ko nawa oilonga yavo, omikundu naasho ve lineekela.
Omuprima minista okwa weda po kutya eenghundafana otadi ka ningwa oshilongo ashishe shaashi epangelo otali kongo omadilaadilo okudja kwaavo va kwatelwa mongeshefa ei ihe li paveta nokulandifa kwokomalungula.
Oshinima eshi oshi li ombinga ya kula yeenghendabala tadi lalakanene okuxwepopeka okuninga ongeshefa, okuxwaxwameka ounangeshefa mokati kovanyasha nokutota omudingonoko tau yambidida eengeshefa dishona nodopokati di ye komesho.
