Omuprima minista Elijah Ngurare okwa indila elolo lopombada lodoolopa yaWindhoek li ninge omafaneko alo e li pamwe noinima yepangelo ya fimana yomayambukepo opashiwana.
Eshi omuprima minista okwe shi popya pefimbo loshoongalele nelelodoolopa laWindhoek Etitatu ongombinga yopolohalama ya kula yokukundafana nomalelo eedoolopa moshilongo ashishe nokukonakona ekufombinga lao moinima yomayambukepo.
Omukanda wa yandjwa kombelewa yomuprima minista pefimbo leenghundafana owa ti, oundjuwo, omeva nounamapya nounaimuna oyo oinima kwa li ya kundafanwa unene, ounamapya nounaimuna oo unene kwa li wa tofwa mo kutya oshinima sha fimana ngee tashi ya kokulonga oikulya ya wana.
“Oikulya oshinima sha fimana unene. Inatu ningeni oinima idjuu. Onda hala tu longeleni kumwe opo tu wanife po eemumbwe dovanhu vetu pamukalo u li nawa.
Ounhu nau tetekele,” Ngurare ta ti.
Okwa popya kombinga yomumbwe yomahangano epangelo a ulike nghee eepolohalama dao tadi yambidida oilalakanenwa yopashiwana, unene ngaa okupitila meepolohalama dounamapya nounaimuna ngaashi oikunino yoshiwana neepoloyeka dounafaalama tadi lalakanene okuninipika ondjala nomanyutu.
Omuprima minista natango okwa popya kombinga yeyokomesho liwa loshikunino shoshiwana shotete moshitopolwahoololo shaaMaheke, ta ti osha dja nale eteyo liwa manga yo tashi toto eemhito doilonga dovanyasha.
Okwa ti omalelo eedoolopa ee na oshinakuwanifa sha kula mokuyambula po oinima ya fimana yepangelo nokuxwepopeka eenghalo doshiwana okupitila meepolohalama noinima yomayambukepo oshiwana.
Ngurare natango okwa pula eekamusela delelodoolopa loshilando opo di tule omayooloko ado opapolitika penya ndee tadi longele kumwe di xwepopeke eyandjo lomayakulo, ta ti ovakalimo ova teelela ovaleli ve litula mo momayambukepo ponhele yeenamanana dopapolitika.
“Ngee twa hala okuyandja omayakulo kovanhu vetu, natu fudikeni omayooloko etu opapolitika,” omuprima minista ta ti, ta indile ovaleli voshilando va longele kumwe mouwa woshiwana.
Eenghundafana okwa li da nuninwa okunghonopeka, okuyeleka nokukaleka oinima yepangelo nomalelo eedoolopa mondjila imwe.
–NAMPA
