Presidente wongudu yoPopular Democratic Movement (PDM) McHenry Venaani okwa indila presidente Netumbo Nandi-Ndaitwah a kaleke po elongo lopauyelele moikumungu ya kwatela mo oinyangadalwa yongeshefa younona vaye.
Eshi kwa li ta popi noThe Namibian Etivali, Venaani okwa popya kutya nande ovakwapata vapresidente ove na oufemba wokuya mongeshefa keshe paveta, oupyakadi ohau ya po ngee taku longifwa eenghono dombelewa opo kuyandjwe ile ku monike omauwa ovakwapata.
“Ashike itandi tu kumwe noshinima eshi kutya ovanhu ovo ve li melelo otava longifa eenghono deembelewa davo va yambule po ounona vavo,” Venaani osho a ti ngaho.
“Presidente na yeleke nawa kombinga yelongo lopauyelele shaashi omu na ounona vamwe moshilongo omu ve na oufemba wokuninga ongeshefa.
Ngee ovana vaavo ve li mepangelo otava mono eengeshefa dakula okupitila momakwatafano ile omaxwaxwameko, nena opu na oupyakadi wakula.”
Okwa weda po kutya ovo tava ningi omafeekelo aa navo nava tale nawa noveta oya pitika ovakwapata vovanambelewa vepangelo va ninge ongeshefa, ashike oinyangadalwa ya tya ngaho inai yandjwa shihe li pauyuki okudja kombelewa yapresidente.
“Omolwashike ounona aveshe veepresidente hava mono eengeshe dakula moshilongo omu? Natu kale lela twa kotoka ndee hatu popile ounona vetu aveshe shi fike pamwe,” Venaani osho a ti ngaho.
Omapopyo aye okwa landula eelopota doikundaneki kutya ounona vapresidente ove li moshikondo shomahooli noshimoko, oshikondo osho Nandi-Ndaitwah a tula koshi yombelewa yaye divadiva eshi ashike a ya mombelewa momafiku 21 Marsa odula ya dja ko.
Natango, minista mukulu wokabinete Helmut Angula okwa ti ombelewa yapresidente oi na okuyeleka oshikumungu eshi tashi popiwa koshiwana, ta ti osha ninga oshikumungu shoshiwana.
Eshi kwa li ta popi noDesert FM Etivali, Angula okwa ti: “Itashi dengele kutya nava nyamukule meendelelo ashike oku na oshinakuwanifa shokuyandja ouyelele koshiwana kombinga yoshikumungu sholudi eli.”
Presidente wongudu yoIndependent Patriots for Change Panduleni Itula okwa yandja oushima ketokolo lokutula omahooli noshimoko koshi yombelewa yapresidente, ta ti kutya ola teya omilandu dekotamhango dekalelepo loministili nola eta oupyakadi wokulipa omauwa mwene.
Eshi kwa li ta nyamukula omapulo oThe Namibian Etivali Itula okwa ti ewiliko lomahooli tali ningwa kombelewa yapresidente kali li mondjila noka li li pamwe nekotamhango laNamibia.
“Kashi li mondjila omutwe woshilongo u kale tau wilike omahooli noshimoko,” Itula osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
