Minista womayambulepo eedoolopa noitopolwa yokomikunda James Sankwasa okwa ti ina pumbwa okupopya kutya ote ya a talele po oikandjohoololo yoitopolwahoololo nomalelo eedoolopa.
Okwa ti ngee okwa popi kutya ote ya a talele po otashi dulu okweeta eekamusela di holeke oinima oyo i li po ya puka.
Sankwasa okwa li ta nyamukula keyandjo loushima lakamusela wokoshikandjoololo shaAminus Peter Kazongominja kombinga yomatalelepo oo taa ningwa kuminista omafiku aa.
“Ihatu lopota keeminista. Ohatu lopota kovanhu ovo ve tu hoolola. Eeminista itadi di dulu ashike okuuya koitopolwahoololo yetu inadi tu lombwela ndee tadi kala da hala tu ningi oyoongalele. Omikalo di li ngaho otadi lyatele pedu eenghono detu. Nave lihonge kutya eekamusela dopaikandjohoololo ohatu longo ngahelipi,” Kazongominja osho a ti ngaha pefimbo lomutumba weumbo etivali lopashiwana oshivike sha dja ko.
Sankwasa okwa lombwela oThe Namibian mexuliloshivike kutya okwa hoololwa opo a yandje omayakulo koshiwana, oshinima osho yee a hala okuwanifa po.
Okwa ti oshinima eshi osho ngaa shi li yoo nokeekamusela doikandjohoololo, odo kwa li da pumbwa okuyandja omaumbo, omalusheno, oundjuwo, omeva neepate.
Okwa ti omatalelepo aye otaa lalakanene okukwashilipaleka elongopauyelele nosho yo okumona kutya eekamusela odo da hoololwa otadi yandje ngaa omayakulo moshili.
Sankwasa okwa ti yee oha talele po ashike oikandjohoololo oyo ngee ku na oinima ya lopotwa.
Minista okwa tameka okuninga omatalelepo aye okutalela moshitopolwahoololo shaZambezi petameko lomwedi ou, mwa kwatelwa noBukalo Village Council, nokwa teelelika a ka talele po oitopolwahoololo ihapu.
Sankwasa okwa ti okwa tameka omatalelepo aye moshitopolwahoololo omo a dja opo a kelele omalundilo kutya oku na oluhoko ile ota amene oshitopolwahoololo shaye.
Okwa ti ote ke liumbatela ovanhu aveshe sha faafana.
INA TILA
“Inandi tila ile nda fya ohoni ovanhu va kale ve yele nge. Ngee ovanhu ova kala ve yele ngee medina lokuninga oinima i li mondjila, onde shi pandula. Nande oJesus kakwa li e holike molwokuninga oinima i li mondjila,” Sankwasa osho a ti ngaho.
Okwa yandja oshiholelwa omo elelo limwe la yandja oimaliwa yomalweendo komunambelewa keshe odula, ta ti kutya kashi li paveta.
Okwa pula yoo elelo kutya oshike la pitika omboola i ningwe koshimaliwa shi fike poN$300 000 ndee inai fikama fiyo opapa.
“Oshi ovakwashiwana voshilongo eshi va pumbwa okukala va teelela eshi? Ngee elelo, inali ninga po omboola opo, ola kufa ashike ominino momunino ou wa kula, tali kala la hala okutula po eetenda domeva deelita 10 000 di li nhee, keemiliyona N$2. Oshi li mondjila osho?” Osho a pula ngaho.
OUMBADA NEKALELEPO LOINIMA
Sankwasa okwa ti kutya ngee eekamusela otadi longo oinima ya yuka, nena kapu na omumbwe yokula da tila, ovo ovo ashike ve na ohokwe yokuhoololwa nava kale ve na oumbada wokunyanwa.
Okwa ti eevata ngaa edi da pumbwa oku va amena odo ngaa tadi ungaunga nomaliumbato avo a puka, ta weda po kutya minista oye ngaa omutuli moilonga weevata odo tadi wilike.
“Aame handi wilike eekamusela. Ohandi di talele, oyo oilonga yange oyo,” Samkwasa osho a ti ngaho.
Sankwasa okwa lombwela oshifokundaneki eshi kutya okwe lipyakidila ta konakona omusholondodo womikanda odo vati di na ouyelele kombinga yoinima ya ningwa ihe li paveta ashike okwa ti ouyelele oo ite u popi pondodo ei. Shimwe shomwaai osha kwatela mo oshibofa omo vati eekamusela da shonopeka ondado yedu fiyo opoN$5 mosquare mita, Sankwasa osho a ti ngaho.
“Ohava mono omadu aa ndee tave a ningi po avo, opo nee ve ke a landife po koshiwana nawa,” Osho a ti ngaho.
Okwa ti kutya edu olo kwa li li na okukala li na oshimaliwa shi fike poN$1 500 ile poN$3 000 paife otali landifwa koN$600 000.
Moshibofa shikwao, omikanda oda holola omonakadona wakamusela vati e na eenhele dedu di li 15, tashi limbililike kutya oshinima eshi osha enda ngahelipi.
Eshi, okwa ti, osho tashi linyenge paife, osho sha eta opo a ninge etokolo lokukala ita shiivifa omatalelepo aye komalelelo eedoolopa noikandjohoololo shaashi oku na oumbada kutya oumbangi otau kala u holekwe.
Okwa ti eekamusela oda udaneka okweeta omayambulepo eshi da hoololwa, onghee nee nadi wanife po omaudaneko ado ndee inadi lipa ashike eetendela nomadu.
OMBEDI INAI PEWA SWAPO
Sankwasa okwa ti okudja ngaa momudo 1990, hamungala keshe Omunamibia okwa holola eudonai mepangelo longudu tai lele.
Ashike, nande ongaho, okwa ti ovanhu ashike oohandimwe ve li mongudu tava kongo oku liyambapaleka ovo va eta oinima i lunduluke.
“Ovahoololi ova handukila Swapo medina loulingilingi. Eengudu domilameno otadi longifa oshinima eshi ongoshilwifo. Ashike ovanhu ashike vamwe ve li mongudu ovo va puka, kashi fi ongudu,” Osho a ti ngaho.
Okwa ti ovanapolitika nava kale tava yakula oshiwana nde inava mona ashike eemhito dokuliyambapaleka, kutya nee ove li kongudu i lipipo.
Sankwasa ita ka fiya emanya la londa ku likwao fiyo oilonga ashishe ya puka ye ya koluheela novakayuli vonyanga va kalela po oilonga yavo ya kaka komesho yoveta.
Kamusela woshikandjohoololo shaMukwe Damian Maghambayi okwa popila Sankwasa sha landula omapopyo aKazongominja.
“Okwe ya koMukwe konima nde mu ifana ashike okwa ninga lela nawa kombinga yeenghundafana doinima oyo tai wapalele eembinga adishe,” Osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
