Nekundi a popi kutya kena ohokweyokuninga amushangandjayi

Minista gwiilonga niiyenditho Veikko Nekundi okwa popi kutya kena nande ohokwe yokuya mondambo yaangoka ta ka ninga amushangandjayi gwongundu yoSwapo, pomahogololo gongundu yawo ngoka kwa thaanekwa taga ka kala ko omumvo twa taalela.

Nekundi ndhoka okwe dhi popi petameko lyoshiwike shika moonkundathana nonzonkundaneki ndjika, pethimbo a popi kombinga yiinima ya yooloka mwa kwatelwa wo ondjila ye yopapolitika sigo oompaka.

“Ngame itandi ka kutha nande ombinga monkatu yuuamushangandjayi. Itandi ka kutha ombinga momahogololo gaaleli yane yopombanda,”osho a popi ngaaka.

Nekundi, opamwe naminista goondolopa nomapendulopo gokomikunda James Sankwasa, oya kala oyo yamwe yomoominista ndhoka tadhi imonikila nokupupulwa kombunda koshigwana melelo epe lyomupresitente Netumbo Nandi-Ndaitwah.

MuJanuali, omapopyo ogiindjipala kutya Nekundi, ngoka a li nale omupeviamushangandjayi gwewawa lyaagundjuka moSwapo, otashi vulika a ka ye mondambo okutala ngele ta sindana omahogololo guamushangandjayi wongundu yawo.

Omifofodholo natango odhi ingaana kutya omuprimaminista Elijah Ngurare osho wo omuleli gwewawa lyaagundjuka moSwapo Ephraim Nekongo nayo otashi vulika ya ka kuthe ombinga momahogololo gaaleli yopombanda yane yongundu.

Oonkatu dhaaleli yopombanda yane yongundu tadhi popiwa odho: yuupresitente woSwapo, yuupevipresitente woSwapo, yuuamushangandjayi osho wo yuupeviamushangandjayi.

Nekundi okwa popi kutya ita vulu nande okutengeneka ngele Ngurare ota ka kutha ombinga momahogololo ngoka ashike nando ongaaka okwa popi kombinga yekwatathano ewanawa ndyoka e na naNgurare.

“Ohatu popi esiku kehe. Ina lombwela ndje sha ngele okuna ohokwe yokukutha ombinga [momahogololo].

Onkene ngame naye otwiimangulukilathana. Ohatu popi kombinga yiinima oyindji: iinima yetu yopaumwene, yepangelo, yoSwapo, niinima ayihe yilwe,”osho minista a popi ngaaka.

Okwa popi kutya omapopyo getopoko pokati ke naNgurare okwa li ge etwa po kwaamboka kwa li taya kambadhala okwe eta etopoko moSwapo pethimbo ya li ya taalela omahogololo guuleli womongundu yawo mo2027.

“Ohatu kala nokuli tatu yolo kombinga yondjokonona yetu yomewawa lyaagundjuka nohatu kala tatu shi popi olundji. Onkene kungame ineya ko [ta popi kombinga yomahogololo ngoka].

Ngele okwa pyakudhukwa, nena oteshi lombwele ndje. Tse yaali otwa mangulukilathana. Inandi hala nande okukala omweendithi gwoohapu,”osho Nekundi a popi ngaaka.

Okwe ekelehi omifofodholo tadhi ingaana kombinga yaamboka taya ka kutha ombinga mondambo yuuleli womongundu yawo pomahogololo gomumvo twa taalela.

“Omifofodholo, omifofodholo ashike. Ngame kandishi gumwe gwomwaamboka haya koleke oohapu nenge okweenditha oohapu,”osho a popi ngaaka.

Pokati mpoka, omuleli gwewawa lyaagundjuka Nekongo okwa popi kutya ngashingeyi okuyele noonkondo okutseya ngele okwa pyakudhukwa oku ka kutha ombinga momahogololo ngoka nenge hasho.

Okwa popi kutya oshinenenima she, opamwe niilyo iikwawo mongundu yawo, okukala ya shilipaleka kutya oya gwanitha po iilonga niinakugwanithwa mbyoka ya pewa.

Nekongo okwa gwedhapo kutya nonande ompito opo yi li opo a shune mo mondambo yokuhogolululwa ponkatu yuuamushanga wewawa lyaagundjuka mongundu, onkene “oonkundathana kombinga yaashoka inaadhi tameka natango”.

“Ngiika otandi ka kutha ombinga muuamushangandjayi wewawa lyaagundjuka. Kandishiwo.”

Ewawa lyaagundjuka mongundu yoSwapo otali ka ninga omutumba gwomahogololo omumvo twa taalela, sho ta ku ka hogololwa omuleli gwewawa ndyoka.

Pokati mpoka, omupeviamushangandjayi gwoSwapo Uahekua Herunga okwa popi kutya sigo oompaka ina ninga etokolo ngele ota ka kutha ombinga momahogololo ngoka gongundu omumvo tagu ya.

“Inandi ninga etokolo sigo oompaka. Ngele onda hala okukutha ombinga otandi ke shi tseyithila oshigwana,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.