Nekongo a popile uuleli wewawa lyaagundjuka pomimvo 41

Ephraim Nekongo

Amushanga gwewawa lyaagundjuka mongundu yoSwapo [lya tseyika nawa Swapo Party Youth League (SPYL)], Ephraim Nekongo (41), okwa popile oshinakugwanithwa she shokukala oye omukuluntu gwewawa lyaagundjuka poomvula dhe nokwa popi kutya iilonga ye okudheula aagundjuka mboka ye li mewawa lyawo.

Nekongo okwa popile okukala kwe momutungilo gwewawa lyaagundjuka sha landula sho aavongokononi yamwe yopapolitika ya popi kutya ewawa lyaagundjuka olyi na ando okukala aantu yomimvo dhopevi.

Ekotampango lyewawa lyaagundjuka mongundu yoSwapo olya pitika omuleli gwalyo a kale ko sigo opomimvo 45, omanga iilyo oyi na okukala yi li pokati komimvo 18 no35.

Ekotampango lyaNamibia olya tongonona kutya aantu mboka ya talika ko ongaagundjuka oomboka ye li pokati komimvo 16 sigo 35.

“Ngele ongame amushanga gwewawa lyaagundjuka moSwapo ndi na omimvo 37, nondi li koshipundi natango, nena otandi vulu okuhogolululwa ndi kale ko sigo opomimvo 45. Ekotompango lyewawa lyaagundjuka mongundu yoSwapo osho tali popi ngaaka,” osho Nekongo a popi ngaaka.

Okwa lombwele onzonkundaneki ndjika mEtine kutya eyooloko kombinga yomimvo dhuuleli olye etwa po opo ku gandjwe ompito “kaakuluntu” ya lele nokugandja omayele kiilyo mbyoka yoomvula dhopevi.

Nekongo okwa popi kutya aakuluntu nayo oya pumbiwa lela molutu lwewawa lyaagundjuka mongundu yoSwapo ngaashi naanaa aakiintu naaagundjuka ya pumbiwa mo.

“Itatu ti nande [tse aakuluntu] otwa hala okukwata ko iinima ayihe. Owa pumbwa okukala wu na mo aakuluntu, aakiintu ishewe owa pumbwa okukala wu na mo aagundjuka opo oshinima shi ende nawa,” osho Nekongo a popi ngaaka.

Nekongo okwa popi kutya okwa ninga omaindilo kolutu lwongundu yaayehe opo aagundjuka okuza mewawa lyawo ya kwetelwe mo moonkatu dhomitungilo dhongundu yaayehe ndjoka ya kwiinina ewawa lyaagundjuka.

Ashike nando ongaaka ina popya kondandalunde kutya ngiika oolye ya hogololwa mo taya gandjwa opo ya pewe oonkatu molutu lwongundu yaayehe ashike okwa popi kutya mewawa lyaagundjuka omuna mboka ya adha iipumbiwa yokuya momutumba gwopashigwana osho wo mOkabinete.

Okwa popi kutya mboka haya pewa ompito okuza moSPYL okuya momitungilo dhongundu yaayehe yoSwapo ohaya hogololwa kewawa lyaagundjuka.

Omundjandjukununi gwopapolitika Rakkel Andreas okwa popi okwaauvanawa komuleli gwewawa lyaagundjuka omukuluntu, okuna okukala kwa zi kiilyo yewawa lyaagundjuka mbyoka inaayi nyanyukilwa omupresitente sho kwa li a hogolola aagundjuka ya ye momutumba gwopashigwana inaashi tokolwa kewawa lyaagundjuka, ano iilyo yomutumba iyali Emma Theofilus naPatience Masua.

“Opwa li iilyo yimwe yewawa lyaagundjuka moSwapo mbyoka kwa li ya geyela oshinima shoka molwashoka (ombelewa yomupresitente) inayi pitila moonkatu nomomapeko goSwapo kombinga yuuleli sho a hogolola aanona yaakadhona mboka nda tumbula [pombanda],” osho a popi ngaaka.

Andreas okwa popi kutya oshinima shoka kashi shi oshipe mongundu yoSwapo.

Okwa popi kutya ongundu oya pumbwa okuninga omapukululo kombinga yengambeko lyoomvula dhaagundjuka mewawa lyoSwapo.
Ashike nando ongaaka okwa popi kutya ke wete ongundu yoSwapo tayi ka lundulula mbala ekotampango lyawo.

Okwa gandja oshiholelwa kekotampango lyaZimbabwe hoka iilyo 10 megumbo lyopashigwana hayi kala yo odhekelwa aagundjuka.

Pokati mpoka omunawino miikwapolitika Ndumba Kamwanyah okwa popi ewi lyaagundjuka olya simana, neindilo okuza kiilyo yewawa lyaagundjuka moSwapo otali popi etompelo lyi shi okupulakenwa.

“Pauyelele wekotampango lyoSwapo, olutu lwewawa lyaagundjuka olwo talu upike aaleli yokomongula mboka taya kaya mongundu yoyene yoSwapo, ashike opuna oshinima shoka kutya ihaya taliwa,” osho a popi ngaaka.

Shoka osha landula sho Swapo a tegelelwa a ka kundathane kombinga yeindilo okuza kiilyo yewawa lyaagundjuka mbyoka ya pula pu tulwe omulandu gwoopelesenda 50 dhaagundjuka mboka taya kalelepo ongundu yawo momutumba gwopshigwana nomOkabinete.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!