Omuleli gwongundu yo-Namibia Economic Freedom Fighters (NEFF) Epafras Mukwiilongo mEtiyali okwa nyanwa sho a pula minista guuyuki Yvonne Dausab kombinga yuukwashikekookantu we pethimbo lyomutumba gwopashigwana.
Mukwiilongo okwa popi tati: “Pula omusimanekwa minista ngoka uukwashikekookantu we, ngele omulumentu nenge omukiintu.”
Omunandjungu guuthemba womuntu Ndiilo Nthengwe okwa nyana Mukwiilongo, sho a popi kutya [Mukwiilongo] opamwe noongundu dhopapolitika ndhoka hadhi iithana kutya ‘odha huma’ osho wo iilyo yimwe yomutumba gwopashigwana, oye li uugamambinga.
“Oye na uutondwe womashenge yo ishewe oye na uundandi,” osho Nthengwe ya popi ngaaka.
Okwa popi kutya molwashoka omutumba gwopashigwana ogwa pitika iinima ngaashi uugamambinga shoka otashi ulike kutya etulo miilonga lyontotwaveta yomapopyo guutondwe itayi ka tulwa mbala miilonga.
“Ongundu yo#ShutItAllDown
Namibia oyi na okutsikila ekondjitho lyuugamambinga poonkatu adhihe,” osho a popi ngaaka.
Omunawino miikwapolitika Ndumba Kamwanyah okwa popi kutya omayamukulo naashoka tashi popiwa kaaleli yopapolitika pethimbo ndika, otaga ulike okwiimonikitha omolwomahogololo go2024 ngoka twa taalela.
“Olukongo [lwomawi], molwashoka oyeshi kutya Aanamibia oyendji itaya yambidhidha iinima mbika [yomashenge],” osho a popi ngaaka.
“Iilyo yomutumba gwopashigwana oya pumbwa okukondemwa kwaayehe mboka ya simaneka ongushu yuuntu. Epulo lyaMukwiilongi olyi li pautondwe,” osho a popi ngaaka.
Okwa popi kutya ndhoka dha popiwa kuMukwiilongo kaadhi li nawa, odha guma komuntu, itaadhi taambiwa ko ishewe omaihumbato goludhi ndoka kage li pakotampango lyomuntu e li oshilyo shomuntumba gwopashigwana.
Omundjandjukununi gulwe gwiikwapolitika Erika Thomas okwa popi kutya oshilongo osha pumbwa okutala kiinima ya simana ngaashi ekondjitho lyoluhepo.
“Otwa pumbwa lela okushuna poshitaafula tse tu hangane okukondjitha omutondi – ano oluhepo,” osho a popi ngaaka.
“Otwa pumbwa okushilipaleka kutya otwa kambadhala okwa adha shoka kwa li twa popi momikandauvaneko dhetu kombinga yonkalo yomagumbo, osho wo iinima yilwe,” osho a gwedha po ngaaka.
Thomas okwa popi kutya ongundu yoSwapo oya ninga epuko sho iilyo yawo kwa li ye eta po Ekotampango ndyoka li na iinima yimwe inaayi yela.
