NEFF a kondema eyaho lyaafekelwa yatano mOkahandja

Omupresitente gwongundu yo-Namibia Economic Freedom Fighters (NEFF), Epaphras Mukwiilongo, okwa tongonona oshiningwanima shopolisi ndjoka ya yaha nokudhipaga aafekelwa yatano mOkahandja, oshiwike sha zi ko, ongoshinima tashi uvitha nayi.

Ongulohi yEtiyali lyoshiwike sha zi ko, opolisi yaNamibia mekwathelo lyopolisi yoshilandopangelo oya yaha nokudhipaga aafekelwa yatano mboka taku hokololwa kutya oya adhika ye na omalongekidho goku ka yuga ehala lyontumba mOkahandja.

Pauyelele wopolisi aafekelwa mboka oya li yahamano ashike gumwe okwa hupu sho e shi pondola okufadhukapo, noya yahwa nokudhipagwa kopolisi pethimbo ya li tayi iyumbu nopolisi.

Mukwiilongo mEtine lya zi ko okwa zi mokalungu nokunyana opolisi sho a popi kutya opolisi oya kala “ya landula aagundjuka mboka” okuza mOvenduka manga inaaya thika pehala ndyoka taku hokololwa ya adhika taya ka teya.

“Oya tokola okuyaha nokukutha oomwenyo aanona mboka yaagundjuka. Kandishi kutya opolisi yaNamibia oyi na uupyakadhi washike naagundjuka,” osho a popi ngaaka.

Mukwiilongo okwa popi kutya shimwe shomwaambyoka tayi hwahwameke aagundjuka ya kuthe ombinga miimbuluma, onkalo yokwaana iilonga moshilongo ndjoka yi li pombanda.

“Omolwashike inaaya etha aafekelwa ya thike pehala mpoka ya adhika taya ka teya yo ye ya mangele po? Pamwe aafekelwa mboka kaya li taya yi kehala ndyoka tali popiwa, omolwashike inaaya tseyithila opolisi yaKahandja peha lyokuyaha?” osho Mukwiilongo a popi ngaaka.

Sigo oompaka opolisi inayi gandja uuyelele womuule kombinga yoshiningwanima shoka. Ondjayi yopolisi moshilongo, Joseph Shikongo naye inatya ko sha koshiningwanima shoka.

Olopota kombinga yoshiningwanima shoka inayi pitithwa omolwomakonakono ngoka taga ningilwa pehala lyoshiningwanima osho wo omufekelwa gumwe ngoka e li we natango mokashoko kopolisi.

Uuyelele mboka okwa li wa kolekwa komupopiliko gwopolisi yaKhomas, Silas Shipandeni, oshiwike sha zi ko.

“Ondjayi yetanga lyopolisi [Joseph Shikongo] okwa gandja elombwelo opo kaaku gandjwe uuyelele wa gwedhwa po sigo ya mana okutula kumwe olopota yoshimbuluma,” osho a popi ngaa.

Mukwiilongo okwa popi tati: “Uuna ookalyamupombo ye shi pondola okuyaka, yamwe yomaapolisi mboka ohaya pula oombumbo kookalyamupombo opo ya kanithe po iipotha. Uuna ookalyamupombo ya tindi okugandja oombumbo ndhoka taya pulwa kopolisi, nena aapolisi ohaye ya lombwele kutya otaya ka shilipaleka kutya otaya dhigupaleke iipotha yawo.”

Okwa gwedha po kutya okudhipaga aantu ye li yatano poshikando, otashi ulike kutya kapu na uushili nopolisi oya longa oshimbuluma.

“Mboka uumbudhi uutokele, aagundjuka mboka kandiwete yu umba opolisi nande. Otaya ka umba ngiini ngele kaye na shoka ya yaka? Aantu otaya vulu owala oku umba ngele oye na shoka ya yaka. Ndyoka edhipago owala lya ningwa kopolisi, aanona mboka inaya umba sha, opolisi oya tameke owala okufekela nokuza mpoka oya patulula omulilo,” osho Mukwiilongo a popi ngaaka.

Omupopiliko gwopolisi moshilongo, omupevikomufala Kauna Shikwambi mEtitatu okwa popi kutya onkene ya tegelela olopota yothaathaa okuza kukomanda gwopolisi yoshitopolwa shaTjozondjupa.

Okwa koleke kutya omufekelwa omutihamano onkene ta kongwa, naafekelwa mboka okwa li ya landulwa kopolisi okuza kOvenduka nokwa li taya ka yuga ondunda yomashina gokundombola iimaliwa, mOkahandja.

Oshiwike sha zi ko, hahende Kadhila Amoomo okwa popi kutya ita popile iimbuluma ashike aagundjuka oyendji otaya longo iimbuluma ngashingeyi omolwonkalo yokwaana iilonga moshilongo ndjoka ya yaga kegonga.

Amoomo okwa popi kutya oshiningwanima shoka shaagundjuka yatano ya dhipagwa kopolisi osha pumbwa okupendula aaleli yoshilongo kutya onkalo yokwaana iilonga oya yaga kegonga notayi hwahwameke iimbuluma noya pumbwa okuyapukilwa meendelelo.

“Ngiika shika otashi kala etukulutho kepangelo lyetu opo onkalo yokwaana iilonga maagundjuka yi talike ko ongonkalo yopaulumwempumbwe,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.