Haende akula Festus Mbandeka okwa kelela edipayo lomutamaneki wokOndangwa Justine Shiweda, ta ti kutya oli li eponokelo lomhango yoveta nomahangano oudemokoli aNamibia.
Eshi kwa li ta popi noNampa poEros Airport mOvenduka Etine, Mbandeka okwa ti Shiweda okwa li a dipawa mangha kwa li ta longo oilonga yaye ponhele yoshiwana.
“Otu li apa tu yandje efimaneko komunailonga pamwe nafye oo a xulifila moilonga.
Okwa fya efyo linyanyaleka shaashi okwa li a ponokelwa nokudipawa shaashi okwa li ta longo oilonga yaye ponhele yoshiwana,” osho a ti ngaho.
Mbandeka okwa ti nande ovanambelewa voikwaveta novanambelewa vomhangu ova kala nokuponokelwa nale, eponokelo linyanyalifa olo la ningilwa Shiweda olo lotete loludi eli moNamibia.
Shiweda okwa li a yashwa lutatu ndee ta vendelwa oudiyo ongula yomafiku 17 Oktoba odula yandja ko, mangha kwa li ta longekida ounona vaye e va twale kofikola yee a dule nawa okuya koilonga.
Otaku tiwa vati oonakuninga oshiningwanima eshi ova kwatelwa moshikumungu shoshimbuluma omo oye a li omutamaneki.
Ovakwapata, ookaume, ovanailonga pamwe naye noilyo yoshikondo shoikwaveta okwa li va ongala poEros Airport va lekele Shiweda eshi olutu laye kwa li tali tukifwa li ye kOndangwa.
Oshivilo dimbuluko osha ningwa Etitano kOnambango, nefudiko laye ola li ko Olomakaya.
Okwa weda po kutya oshiwana otashi lili pamwe novakwapata vaShiweda, mwa kwatelwa ounona vaye vavali novadali vaye.
“Ohatu kelele oiningwanima yoludi eli ongoshiwana otwa tula eenyala kumwe tu li ominge naashi. Natu kwashilipaleke kutya Justine ina fya ashike epwanga,” osho a ti ngaho.
Okwa ti kutya epangelo ola tameka okutula po omilandu donhumba kunghonopekwe eameno lovanambelewa voikwaveta novanambelewa vomhangu, mwa kwatelwa keemhangu nokomaumbo avo.
Mbandeka okwa anya okuyandja ouyelele womoule, ta ti kutya omulandu ou natango owomeni nou li metifa.
-NAMPA
