Natango iilonga yomukuluntu melelo lya Karas oyi li owala

OSHIGONGI shelelo lyoshitopolwa sha Karas osha li sha piyagana kashona mokukundathana ehala lyiilonga yomunambelewa omukuluntu gwelelo ndyoka.

Iilonga mbika oya kala ethimbo yi li owala okuza sho omunambelewa ngoka a li ena iilonga mbika a li inaa shunwa we miilonga.Oonzo dhi shi kwiinekelwa odha hokolola kutya omwa li oonkundathana dha pupyala kombinga yosheetwapo shika ngele ehala lyiilonga mbika na li tseyithwe ishewe olutitatu nenge ahawe.Iilonga mbika oya kala yaana omuntu oku za mu Kotoba 2008 sho ewiliko lya tseyitha noku hiya aantu ya ninge omaindilo opo ya pewe iilonga mbika.Mu February 2009 iilonga mbika oya tseyithululwa, naa indili yatano oya li ya tulwa momusholondo gwaahogololwa mboka ya kundathanwa nayo. Mbaka oyo omukuluntu gwelongo moshitopolwa sha Hardap, Ben Boys, Maureen Hinda, omuwiliki gwelelo mepangelo lya Karas, Saul Kahuika, Simon //Garoeb nomuwiliki nale gwa Namwater kuumbugantu , Lepoldt Niipare. Amushanga omukuluntu mUuministeli womapangelo giitopolwa, nomagumbo, Erastus Negonga okwa li a popile, Niipare oye na ulikwe ongo omunambelewa omukuluntu gwoshitopolwa shoka, oshoka oye a mono iitsa oyindji pethimbo lyomapulapulo.Ndele ethaneko lya Negonga ina li pita,oshoka Okommissi yiilonga yepangelo[PSC] oya tindi okukoleka epopilo lya Negonga, sho ya ti oya mono oshinima inaa shi longwa nawa kombinga yepopilo ndika.Okommissi oya ti oya mono kutya Negonga okwa popile euliko lya Niipare omanga a li inaa tseyithila ewiliko lyelelo lyoshitopolwa sha Karas, osho oThe Namibian ya li ya tseyithilwa.Oshitopolwa shimwe shompango yomalelo giitopolwa otashi ti elelo lyoshitopolwa oli na oku ulika omunambelewa konima yoku kundathana noMinista.Okommissi oya pula woo kutya omolwashike, Negonga inaa popya sha kombinga yaashoka shaningwa nomaindilo gaamboka ya indilile iilonga mbyoka sho mbika ya li ya tseyithwa tango.Poshigongi shoshiwike shayi ota ku hokololwa kutya aawiliki yoshitopolwa sha Karas, Hilma Nikanor, Toivo Nambala, Dawid Shoombe, na Paulus Efraim oya li ya kondjitha osheetwapo tashi ti ehala ndika lyiilonga na li tseyithwe ishewe olutitatu. Nayo aniwa oya popile ethaneko noya popile, Niipare oye na pewe iilonga mbyoka.Ndele Gavena gwoshitopolwa, Dawid Boois na Willem Appolus oya kondjitha ooyakwawo mbaka ya ne, nethaneko, kutya ewiliko lyoshitopolwa nali tegelele sigo uuna ndoka omapulo ngoka ga pulwa koKommissi yiilonga yepangelo ga yamukulwa.Onzo yimwe oya ti poshigongi shoka opwa uvikwa kutya Niipare okwa li a ningi eindilo lyiilonga mbika lwotango ndele ka li a tulwa momusholondo gwokandidate oshoka ka li ena iipumbiwa ayihe ya halika molwa oshilonga shika.