Omuleli welelo lopamufyuululwakalo laNdonga, Fillemon Shuumbwa Nangolo,okwa pandula oilonga yopolifi moshitopolwahoololo shaShikoto nOshana yokukwata po nokwiidilila ovanhu ovo tava longo oimbuluma moitopolwahoololo ei ivali.
Nangolo oshinima eshi okwe shi popya Etitatu kombala yaNdonga komukunda Onambango moshikandjohoololo shaLukonda pefimbo loshoongalele shepatululo loilonga yokomudo novakufimbinga.
Okwa pandula kondadalunde opolifi yaNamibia moshitopolwahoololo shaShana eshi ya ninga omakonakono nokumanga po ovanhu ovo va kwatelwa moshiningwanima shokuyasha nokutila oudiyo omutamaneki wokOndangwa, Justine Shiweda.
“Shiweda okwa li a ponokelwa keumbo laye mOndangwa ndee opolifi oya kufa ashike omafiku avali okumanga po ovo va ninga oshiningwanima eshi, osho oshi pandulifa,” osho a ti ngaho.
Nangolo natango okwa pandula opolifi moshitopolwahoololo shaShikoto eshi vati ya manga po nakuyasha mwene womukunda Onelago, Sam Nepando, nokulemaneka mwene womukunda Iikokola, I-Ben Nashandi, petameko laJanuali 2026.
“Otu wete oilonga yeni nonghee hamu nyamukula diva koimbuluma notwa hala ashike tu mu pandule eshi mwa kwata po ovo va ningila ovakwashiwana oinima ei inyanyalifa.
Ovo tava tamanekwa paife ove li konima yekumba molwoilonga yovanambelewa vopolifi ye litula mo,” osho a ti ngaho.
Eshi kwa li ta popi poshoongalele apa, omukulunhu wopolifi mOshikoto komufala, komisina Nangula Iifo, okwa shiivifa kutya oufano veameno (CCTV) otava ka tulwa paife meedoolopa domoshitopolwahoololo di li nhatu, Tsumeb, Omuthiya nOniipa.
Okwa ti opolifi oya pewa omaano oufano mafiku aa okudja kehangano loRubicon Security moTsumeb, ovo va teelelwa va tulwe mo.
Iifo natango okwa indila oshiwana shi vatele opolifi nokulopota oimbuluma.
Okwa popya kutya opolifi oi na oupyakadi woyeendifo inai wana, ashike okwa kwashilipaleka kutya oipofa aishe ya lopotwa oi na okuungaungwa nayo.
“Ohatu longo pamwe noshiwana nohatu kwashilipaleke kutya ohatu kundafana nasho okupitila moyoongalele yoshiwana nopolifi opo tu nghonopeke ekwatafano pokati kopolifi noshiwana,” osho a ti ngaho.
-NAMPA
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
