Oshiwana shokoshitopolwa shaMaltahohe otashi pula omupedu pelesidente Netumbo Nandi-Ndaitwah opo a kaleke etokolo laminista womidingonoko, omakuti nomatalelepo Pohamba Shifeta eshi a yandja oilonga ina sha novatalelipo kehangano lopaumwene.
Ovakwashiwana ovatumina Nandi-Ndaitwah omukanda, tava pula opo a kaleke edilaadilo laShifeta lokuyandja omhito yoilonga yokuumbata ovatalelipo kehangano lopaumwene oule weedula 25 kombuwa yaNamib.
Omukanda oo wa nyolwa momafiku 15 Apilili, okwa li wa nyolwa komukalelipo woshiwana shokomudingonoko oko, Benno Isaaks.
Okwa sheka etokolo laShifeta lokuyandja oilonga ei kehangano laHeikko Dorgeloh.
Isaaks okwa pula Nandi-Ndaitwah opo a konaakone oshinima eshi, ta ti oshiwana kakwa li sha ningilwa omapulaapulo nosha pula opo eudafano eli li kalekwe.
“Fye ongongudu yovakwashiwana vomoshitopolwahoololo shaHardap, unene ngaa oshitopolwa shelelo lopamufyuululwakalo shaWitbooi, ohatu shangele ombapila ei kwoove ongominista i kulu yomidingonoko nomatalelepo, ou e na owino kombinga yoshinima eshi sha ningwa moshitopolwa omu.
“Omafiku aa, otwa uda kutya okwa li pu na oilonga ya yandjwa po monhele yomatalelepo yedina Namib Naukluft Park ashike kakwa li sha ningwa pamilandu nopauyelele shaashi ovakalimo vomoshitopolwa inava ningilwa omapulaapulo.
“Oilanduli yoshinima osho sha ningwa koministili yomidingonoko, omifitu nomatalelepo kaishi ashike kutya inai hanga oilalakanenwa yokuyandja oilonga ei, ashike natango otashi eta ovanhu vahapu va kanife oilonga,” Isaaks osho a shanga ngaho.
Shifeta okwa yandja oilonga kehangano ledina About AfricaCo, olo tali ngeshefa nedina About Adelt Sossusvlei Management, olo taku tiwa otali ka mona oshimaliwa shi fike lwopeemiliyona N$250 moule weedula 25 li kale tali wilike ovatalelipo moSossusvlei.
Eudafano eli otali yandje yo vali oufemba kehangano opo li kale tali longo nonhele yokuninga eenanda, okweendifa ovatalelipo monhele omo nokuninga okafitola kokulandifa oipumbiwa monhele omo.
“Ohatu pula omupedu pelesidente opo a ninge omakonaakono kombinga yoshinima eshi, omakonaakono kombinga yoinima aishe ya ningwa kovanambelewa vakula navanini voministili moshinima eshi.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
