Omupedu presidente wehangano leengeshefa domoshilongo ledina Namibia Local Business Association (Naloba) Peter Amadhila okwa yandja oushima kongudu oyo ya ya napresidente Netumbo Nandi-Ndaitwah koChina, ta ti presidente okwa dingililwa unene kovanhu ovo tava kondjele ashike omauwa avo opaumwene ndee kashi fi eemumbwe deliko loshilongo.
Amadhila edi okwe di popya momukanda wa shangwa Etine, manga ta shemununa ongudu yeengeshefa oyo ya ya napresidente Nandi-Ndaitwah molweendo laye lopambelewa koChina.
“Ude nge, otwa yambekwa napresidente muwa. Okwa halela oshilongo novanhu vasho ouwa.
Ashike nee, okwa dingililwa kovanhu tava dilaadilifa omapunda,” Amadhila ta ti.
Okwa ti kutya ongudu oyo kai na oilyo yoNaloba ndee ta pula ngee etalelepo otali etele ngaa eengeshefa domoshilongo omauwa a pumbiwa.
Amadhila okwa ti ehangano oli wete kutya oyoongalele i li ngaho omhito ashike yovaleli vopapolitika, ve li kokakalata kepangelo, tava kongo ookaume kondje yoshilongo manga eengeshefa tadi twikile nokumona oixuna ngee tashi ya kekufombinga.
“Otu wete oshoongalele eshi kutya oshoongalele ashike shimwe oko ovanapolitika hava i noimaliwa yepangelo ndee tava kongo ookaume kavo vene ve uye ndee tava ningi ongeshefa navo omu momilaulu tava tula eengeshefa domoshilongo moudjuu,” osho a ti ngaho.
Okwa ti kutya olweendo loshili lopangeshefa okwa li li na okuninga eenghundafana novakalelipo veengeshefa domoshilongo manga inali ya kondje yoshilongo.
“Ngeno olweendo eli okwa li loshili, ngeno presidente okwa shakena ndee ta ningi oyoongalele yeengeshefa ya mana mo novanangeshefa kombinga yolweendo eli ndee tava ningi nawa omafaneko moNamibia,” Amadhila ta ti.
Okwa pula ngee oshi li ngaa mondjila ovanangeshefa tava shakeneke presidente lwotete eshi ve li nale kondje yoshilongo.
“Oshilengifa ovanangeshefa va shakeneke presidente oshikando shotete moChina ndee presidente wetu ota pula: Olyelye ou? Oho ningi ongeshefa yashike? Lipula ashike tave lishiivile kondje yoshilongo,” osho a ti ngaho.
