Presidente Netumbo Nandi-Ndaitwah Etitatu okwa nangeka oRÖssing Foundation Ondangwa Digital Technology Hub noshaala yomaulikilo opaunongononi oyo a lukilwa yedina Dr Netumbo Nandi-Ndaitwah Science Exhibition Hall mOndangwa.
Eshi kwa li ta popi penangeko letungo, Nandi-Ndaitwah okwa ti okuyambula po oungoba okwa fimana meyokomesho laaveshe.
Okwa ti kutya omatungo aa, aa fimana kehongo lopaungoba nokuninipika omwaka pokati kehongo lokomikunda nomeedoolopa moshilongo.
“Mokuyandja eemhito kovanyasha noshiwana dopaungoba, ohatu yambula po oikwafaabulika nokunghonopeka omidi deliko lopaungoba,” osho a ti ngaho.
Ouwa woinima yoludi eli kau shi ashike omatungo, osho a ti ngaho.
“Ohai toto eemhito doilonga, tai nghonopeke oshiwana, tai xwaxwameke omaduto oinima nokukufa ombinga melunduluko lopaliko.”
Oilonga yokuwapaleka etungo olo oya pula eemiliona N$37, ya yambididwa koRÖssing Foundation melongelokumwe noshiputudilo shounongononi noungoba shaChina, oi li ombinga yakula yeenghendabala dokuyambula po omidingonoko delihongo.
Nandi-Ndaitwah okwa ti okuyambula po oungoba oshinima sha fimana mokukwashilipaleka kutya ovanyasha otava endele pamwe nefimbo.
Okwa weda po kutya eyokomesho laNamibia ola pumbwa ovanyasha va deulwe ndele kashi shii ashike ongovalongifi voungoba, ashike ongovatoti novaduti.
“OngOvanamibia, itatu dulu ashike okukala ovalongifi voungoba wa longwa pamwe pe lili.
Natu ninge ovatoti, ovaduti novaongeli vouyelele. Natu nghonopeke ovanyasha va ete po sha osho tashi kandula po omikundu detu manga yo tava kufa ombinga meyokomesho lopaunyuni,” osho a weda po ngaho.
Omatungo aa otaa ka ninga omandiki omalihongo, omaduto oinima nokupaafana omauyelele moshitopolwahoololo, osho tashi nghonopeke oilonga yoshitopolwahoololo mehongo lounongononi neyambulepo leewino.
-NAMPA
