NamWater e li pokuteta ko omeya gaRehoboth omolwoongunga

Ehangano lyokugandja omeya moshilongo lyedhina Namibia Water Corporation (NamWater) oshiwike shika olya gandja elombwelo kondolopa yaRehoboth moshitopolwa shaHardap kutya otali ka teta ko egandjo lyomeya mondolopa ndjoka omolwoondjo dhomeya.

Etokolo ndyoka olya ningwa sho taku hokololwa ondolopa ndjoka ya ndopa okufuta oondjo dhomeya noshe eta yi kale noongunga dhi li pombanda noonkondo.

NamWater okwa popi kutya omalelo goondolopa osho wo omeya gokomikunda oyena oondjo dhomeya dhi li poobiliyona N$2.8, naashoka osha tulitha ehangano lyawo moshiponga shokugandja omeya.

Omupopiliko gwehangano ndyoka, Lot Ndamanomhata okwa popi kutya mongashingeyi oya taalelwa komashongo taga indjipala gopashimaliwa naashoka otashi etwa komalelo goondolopa ngoka itaaga futu oondjo dhawo.

“Momukokomoko gwoomwedhi 11 dha piti, oondjo dhomeya odhi indjipala nooN$400 000 okuza poobiliyona N$2.4, naashoka oshe eta opo oondjo ndhoka dhi dhigupale.

Shoka otashi ke eta oshiponga moshilongo ngele otashiya kokugandja omeya monakuyiwa,” osho a popi ngaaka.

Ondolopa yaRundu oyo yi li ponomola yotango moondjo, noyi li moongunga dhoomiliyona N$300, taku landula ondolopa yaRehoboth ndjoka yina oondjo dhi li poomiliyona N$100.

NamWater okwa popi kutya etsikilo lyoondjo itaadhi futwa otali ke etitha opo pu tulwe omilandu dha yaga kegonga ku gamenenwepo egandjo lyomeya moshilongo.

Mongashingeyi ondolopa yaRehoboth oya gandja elombwelo kaakalimo kutya omeya gomondolopa oge li pokutetwa ko kuNamWater omolwoondjo, ashike nando ongaaka oye li moonkundathana opo kwaadhike ekandulopo lyomukundu ko ku yandwe epato lyomeya.

Oya gandja wo ekunkililo kaakalimo ya kale taya longitha omeya gawo nuukeka.

Uumbanda womeya taga pata otashi vulika wu ke etithe aanasikola ya konda po100 000 ya tuminwe komagumbo notashi ka guma wo aanandholongo ye li po200 mboka ye li mondholongo yopolisi mondolopa ndjoka.

Ndamanomhata okwa popi kutya NamWater okwa kwatathana noondolopa adhihe ndhoka dhi li moondjo, kombinga yiifuta mbyoka tayi pumbiwa okufutwa.

Okwa popi kutya oondolopa 10 odhina oondjo kumwe dhaNamWater dhi li pobiliyona N$1.

“NamWater ota dhenge omukumo kutya nonande omeya oge li oshinima sha simana noonkondo, onkene eyopaleko lyomeya, ompungulilo yomeya, efalo lyomeya osho wo eyandjaganeko lyi li yimwe yomiinima mbyoka hayi pula oshindji nomondjato,” osho a popi ngaaka.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.