Namibia ota lili omutwewoshilongo Dr Hage Geingob

Oshoodaxa, ovaNamibia okwa li va hangwa konghundana yefyo lomupelesidente woshilongo omundokotola Hage Geingob. Omupelesidente okwa xulifa peedula o82 moshipangelo mOvenduka ongula yoshoondaxa.

Oo kwa li nale omupedu pelesidente waye noku li omupelesidente woshilongo paife omufimanekwa Nangolo Mbumba okwa li a shiivifa efyo laGeingob ongula yOshondaaxa.

Ovakwashiwana konima eshi va uda onghundana yefyo lomupelesidente ova tameka okumutangumuna, omo tava hokolola kutya omulumenhu umwe oo a kala nokupopila oukumwe wovAfrika noufike pamwe.

Omupilimaminista Saara Kuugongelwa-Amandhila, okwa tangumuna Geingob ta ti, omunhu ou kwa li eholo ovanhu nokwa li alushe a hala okuwanifa po osho va pumbwa, okwa ti Geingob ka li e lihole nandenande okwa kala alushe ta kendabala okuyandja omayakulo kovaNamibia, yee okwa li a yandja ounyasha waye aushe kekondjelomanguluko laNamibia.

“Oukwatya waye owa eta opo a kale e holike koshiwana, ashike efyo laye ola eta omilaulu moshiwana shetu,” Osho a ti ngaho.

Omunashipundi mombelewa yelelo loshilongo, Lukas Sinimbo, okwa ti Geingob ota kala nokundimbulukiwa onga omukondjelimanguluko, omupelesidente wovanhu nomuhanganifi nomulitulimo mokuninga Namibia eumbo laaveshe.

“Okwa kufa ombinga ya kula mokumangulula oshilongo shetu novanhu vasho,”
Omuleli wongundu yo-Popular Democratic Movement (PDM), McHenry Venaani, okwa hokolola Geingob ta ti, okwa li omunandjungu moinima ihapu nomokuyandja omayakulo koshiwana.

“Efyo lomupelesidente Geingob, oli li ekanifo la kula, kashi shi ashike kovaNamibia ashike okenenedu Afrika alishe,” Osho a ti ngaho.
Onghundana yefyo laGeingob natango oya udifa nai ongudu yo-Independent Patriots for Change (IPC).

Omupelesidente wongudu Panduleni Iitula, okwa hokolola Geingob ta ti, omunhu umwe ou e hole elunduko, omuyakuli woshiwana nomuyambididi wepangelo oo kwa li a itavela mokuyambula po Namibia.

“Otwa uda nai kefyo laye shaashi okwa li twa teelela a veluke opo a twikile nokulela oshiwana osho kwa li e hole unene,” Osho a ti ngaho.
Iitula okwa pula oshiwana opo shi ngungumane noshikwatele po ombili neameno.

Omukalelipo mu kulu, Kaire Mbuende, okwa ti kutya Geingob okwa li omuhanganifi.

“Oku na ondjokonona ya kula oyo a fiya po mokutunga oshiwana nomakwatafo opaiwana,” Osho a ti ngaho.

Omuwiliki wehango loAffirmitive Repositioning (AR), Job Amupanda, okwa ti Geingob okwa li omuyambididi woukumwe wAfrika yee okwa li omuyambididi woshiwana shaye.

Amupanda okwa ti, okwa li a hala omupelesidente a kale ko opo a dule okumona omalunduluko oo taa etwa kovaleli veedula edi ovo a kala ha popi alushe. “Ondi wete kutya okwa li lela e uditeko oufike pamwe,” Osho a ti ngaho.

Omuleli wongundu yo-Landless People’s Movement (LPM), Bernadus Swartbooi, okwa popya kombinga yaGeingob eshi a xwepopeka eliko loshilongo.

Okwa ti okwa mona efimbo eshi eetendela kwa li tadi yandjwa, ndele konima eshi da pwa, kapa li pu na oimaliwa yokufuta ovo va longa ashike Geingob okwe ya mo moshinima shi li ngaha ndele ta kandula po oupyakadi.

“Otwa kala hatu longifa oshimaliwa tuhe shi na. Oshinima eshi osho tashi tula Namibia meengunga nda kula odo hadi uya noishoshela i li pombada neenghono, shaashi okwa li twe i pumbwa opo tu fute ovo ve tu pa eengunga.

“Osha pula opo pelesidente Geingob e uye mo moshinima omo ndee ta ti, efeni itatu dulu okukala hatu longifa oimaliwa tuhe i na.”
“Geingob okwa ti, inatu yandjeni vali eetendela momukalo u li ngaho,” Swartbooi osho a ti ngaho.

Eshi a popya noradio yomudidimbe yoNBC, Swartbooi okwa ti, osha pula eedula di fike lwopo9 opo Geingob a xwepopalife eliko loshilongo nokumona oindjemo i wa koshitukulwa shomatalelepo, oikwamina, noimaliwa yoshilongo.

“Oshilongo shetu ngeno osha ninga Zimbambwe omutivali, ngeno okwa li ha medina laGeingob ou kwa li ta longo ngaha,”
“Eshi Geingob a ninga pelesidente, okwa li tu shi ohatu ka mona eemina di pe neefabilika tadi patuluka, ashike mutu osho hasho kwa li ta lalakanene,” Osho a ti ngaho.

“Mutu pamwe kakwa li ta lalakanene okuxwepopaleka oshikefa shetu, omo kwa li hatu longifa oimaliwa tuhe i na yee a tunge eliko opo omuleli ou ta shikula ko, a hange moshikefa mu li nawa,” Osho a ti ngaho.

Ngoloneya woshitulwa shaMusati, Erginus Endjala okwa hokolola Geingob ta ti, omunhu ou ha popile oshili pehe na nande oshiholekwa shasha.
“Okwa kala ta wilikwa koshili onghalamwenyo yaye aishe yee okwa li alushe a mangulukila okupopya nande nee oshinima oshi i ile oshi wa.
Okwa li alushe a ngungumana kutya nee oku li monghalo i li ngahelipi,” Endjala osho a ti ngaho.

Okwa ti nakufya okwa li omulumenhu woitya yaye iha ningi nande omaudaneko ongao. “Okwa li e na oshisho nokuhole novanhu, unene ngaa kufye ovo twa kala hatu longo popepi naye. Okwa li e na omutima mu wa nokwa kala alushe a manguluka okukuxunga omwenyo ngee we mu pumbwa,” Osho a ti ngaho.