NAMIBIA oku na ashike ohonde ya wana omafiku avali oyo ya shaala po.
Omukulunhuwiliki woministili youndjolowele nomayakulo opanghalafano Ben Nangombe okwa ti oshinima eshi otashi kumu nai epango lovanaudu moipangelo yepangelo.
Omumbwe yakula yohonde ei okwa li ya kolekwa komupopiliko wehangano lokwoongele ohonde laNamibia ledina Blood Transfusion Service of Namibia (NamBTS) Frida Asino pefimbo a li ta popi noDesert Radio Etitatu.
Namibia okwa kala a taalela omumbwe yakula yohonde, nokwa li mu na ashike eepelsenda 25 meenhele dokutuvikila ohonde petameko lomatango manene.
Pokuuka pokili, ehangano lokwoongele ohonde okwa li la lopota kutya oshilongo osha pumbwa ohonde ihapu lela keshe mefiku.
NamBTS okwa li nee vali a tya ovayandji vohonde kakwa li nande va nyamukula ko kovo, Namibia otashi dulika a yuka mefimbo lidjuu.
“Ohonde oyo i li po paife oishona nai. Mefiku ohatu mono ashike ohonde ishona neenghono. Osho shihe na nande oundjolowele,” Asino osho a ti ngaho.
Okwa ti kutya osheetifi shohonde i kale tai shuna pedu ngaha osheshi ovayandji vohonde vakeshe efiku ve li momafudo omatango manene.
“Moipangelo omu na ovanaudu vahapu neenghono ovo va teelela okupewa ohonde sho osho sha eta ohonde i kale ya pumba moshilongo,” Asino osho a ti ngaho.
Minista mukulu woundjolowele Bernard Haufiku okwa ti osha fimana opo ovanambelewa vopaunamiti va kale nokutwa omukumo ovanyasha, ovanhu ovo ve na oukolele opo va yandje ohonde.
Okwa ti eshuno pedu lohonde otashi dulika li etwe kelongifo lomalodu olo kwa li la ya pombada pefimbo lomatango manene.
“Oshinima sha fimana nashi kale kutya, manga omatango manene inaa fika, ningeni oikonga ndee tamu kendabala okuhonga ovanhu kutya osha fimana ngahelipi, unene ngaa opo ovanysha, ovanhu ve na oundjolowele va kale nokuyandja ohonde,” Haufiku osho a ti ngaho, ta weda po kutya ke wete ngee otashi ka kala shipu.
Nangombe okwa pula oshiwana opo shi wanife po oilonga yasho ndee tashi yandje ohonde. Okwa ti okuyandja ohonde otaku vatele neenghono esystema doundjolowele doshiwana.
“Indeni ndee tamu ka xupifa eemwenyo shaashi omwenyo oo otashi dulika u kale woye,” Osho a ti ngaho.
Nangombe okwa ti ovanhu ovo tashi dulika va ka pumbwe ohonde omwa kwatelwa ovo tave ke lihanga moiponga yeetuwa novanhu ovo va pumbwa epango lomaudu e na sha nokukala vehe na ohonde ya wana.
Okwa ti omapango ahapu okwa pumbwa ohonde ndee ta weda po kutya kapu na nande vali omukalo umwe wokumona ohonde uheshi ashike okudja kovanhu.
“Oshinakuwanifa sha fimana shoshiwana, shi ye shi ka yandje ohonde shi xupife eemwenyo,” Nangombe osho a ti ngaho.
Nangombe okwa ti ngee oipumbiwa yopaunamiti oya pumbiwa ndee kai po, otashi i omafaneko epango moshipala moikondo aishe yopaumwene noyepangelo.
“Ohonde moNamibia ohai di ashike kehangano lokwoongela ohonde, oipangelo yepangelo noipangelo yopaumwene aishe oyo tai longifa, ngee kapu na ohonde nena opu na oupyakadi,” Nangombe osho a ti ngaho.
Ongudu yoNamBTS okwa li i li koshipangelo shoWindhoeke Central Hospitala, Coca-Cola mOvenduka nosho yo kOkahandja Mall Etitatu, nonghela ova li koRehoboth.
Asino okwa li a indila oshiwana opo shi ye koHermanus van Wyk Hall shi ka xupife eemwenyo.
Opu na yoo noupangelo vopakafimbo kOngwediva, Oshakati, Swakopmund noMbaye.
Oto dulu yoo okudengela ehangano lokwoongela ohonde moNamibia konomola 063 386 300 opo u mone kutya openi to dulu okuyandja ohonde.
Omupopiliko wopolifi komufala Kauna Shikwambi okwa ti oshinima eshi tashi pulwa kehangano lokwoongela ohonde moNamibia oshinima sha pumbwa okufimanekwa kukeshe umwe.
Okwa ti keshe fiku opu na ovanhu va pumbwa ohonde unene ngaa moipangelo ngaashi oomeme tava mono ounona ile ovo va li moiponga yeetuwa.
“Ohandi pula keshe Omunamibia oo e wete kutya oku na oukolele noku na ehalo lokuyandja ohonde opo vaha tile ndee nava ye ashike va ka ninge elunduluko. Ohonde oyo to yandje otashi dulika i ka xupife omwenyo woye fiku limwe ile womushiivikile woye,” Shikwambi osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
