NGOKA a li nale omuprima gwoshilongo nokwa kala ominista yelongo uule wethimbo ele konima yemanguluko, noku li wo gumwe gwomaamboka taa thigathana po momahogololo guupresidente wongundu Swapo ngoka taga ka ningwa pethikmbo lyokongresa onene yongundu mo23-26 Novomba nuumvo, Nahas Angula, okwe ekelehi omapopyo kutya okwa za mo momahogololo ngaka.
Ndhika Angula okwe dhi popi pethimbo a li ta ningi oonkundathana noThe Namibian mEtitayali lyoshiwike sha zi ko.
Angula ota popi kutya opu na aantu yamwe, mboka a tala kutya aatondi ye, taa tula omushangwa komapandja giikundaneki yoohungi dhoshinanena, kutya momahogololo taga tumbulwa ke mo we.
Omushangwa nguka, ngoka The Namibian e gu mona wo, otagu popi kutya pethimbo Angula naamboka wo ye li kombinga ye momathigathano ngaka, sho ya yile koWalvis Bay ehuliloshiwike twa pilamene, oya li yi ipumu mumwe mohotela yontumba mondoolopa ndjika shoka.
Omushangwa otagu popi kutya okwa ka tokolwa opo ku ningwe omahogololo gosheendela anuwa opo ku tokolwe kutya pokati kaAngula nominista yaanyasha Jerry Ekandjo olye naana ta ka thikama.
Omushangwa otagu ti kutya anuwa Ekandjo okwa dhenge mo Angula nomawi gahamano mu limwe, onkene Angula ita thikama we.
“Otandi ti kutya ndyono eshundulo osho wo uuyelele wiifundja, tawu taandelekwa owina opo wu pukithe aakwashigwana osho wo aayambidhidhi yandje mboka taa ka kala kongresa yo Swapo.
Uuyelele mbuka kawu shi woshili notandi wu ekelehi ngaashi sha pumbiwa,” Angula osho a lombwele onzonkundana ndjika nokugwedha po kutya methigathano moka omo e li nota kala mo sigo mboka taa ka kala kongresa ndjoka ya ningi etokolo yo yene.
Angula okwa yelitha wo kutya ka kwa li nando oshigongi sha ningilwa nando mohotela ngaashi tashi popiwa.
Sho a li a pulwa a tye kosha komapopyo kutya ye pamwe nayakwawo yamwe mboka ye li kombinga ye yo”Team Swapo” oya kulupa onkene itaa vulu oku lela oshilongo, Angula okwa ti: “Oomvula onomola ashike. Itamalo sho wuli ngaaka ngele okwa tiwa natu matuke otashi vulika ndi ku thige po.”
Angula ota ti kutya ehwahwameko lye nongundu yawo yo”Team Swapo” ota li ende nawa noya tegelela esindano.
“Ayihe otayi ende nawa. Esindano opo lili lya yela,” osho a ti pethimbo lyoonkundathana nonzonkundana ndjika.
Okwa holola wo kutya oya ninga nale omahwahwameko gawo kErongo, Omusati, Zambezi osho wo ko//Karas.
Angula, osho wo Ekandjo otaa ka thigathana po nomupresidente Hage Geingob, taa kondjele oshipundi shuupresidente wongundu Swapo pethimbo lyokongresa ndjika.
