Nafinu a tulwa pevi ongo oshilyo sha NUNW molwo olutandu

EHANGANO lyaaniilonga yomoombanga nomahangano haga longo niimaliwa nenge Nafinu olya tidhwamo pakathimbo mefalimi lyomahangano geli kohi yondundahangano yaaniilonga nenge National Union of Namibian Workers[NUNW].

Ota ku tengenekwa kutya Nafinu okwa tidhwamo pakathimbo mongonga ndjika molwaashoka okwa tsondumbo nelombwelo ndyoka tali ti aakalelipo yondundahangano ndjika na yi hogolole, Jerry Ekandjo pomahogololo pethimbo lyoshigongi oshinene shoSwapo shoka tashi tameke metine oshiwike shika moVenduka.Amushangandjayi gwa NUNW, Alfred Angula ina tya sha kombinga yoshinima shoka na okwa uvaneke ta ka gandja uuyelele owindji kusho.Ndele nee amushanga gwa Nafinu ngoka ihaa lile okathima koluko, Asnath Zamuee okwa koleke kutya ehangano lye olya tidhwamo pakathimbo mongundu ndjoka. Okwa ti etidhomo lya Nafinu mo NUNW olya li lya kundathanwa poshigongi oshipitithi nonando Nafinu kali a tuminwa ehiyo mwa kwatelwa iikundathanwa. Okwa ti pamautho Nafinu okwa li ena oku tuminwa omusholondondo gwiikundathanwa pena omasiku 21 omanga oshigongi shoka inaashi ningwa, ndele okwa ti eutho ndika ina li landulwa mompito ndjika.Okwa ti sigo oompaka Nafinu ina taamba etseyitho ndyoka pambelewa, na oku na omasiku 30 opo eli kondjithe. Omatompelo ngoka ga gandjwa kutya omolwashike Nafinu a tulwa pevi okathimbo oshoka aniwa oteeta etopoko mokati ka NUNW. Ishewe Nafinu okwa tulwa pevi molwaashoka a li kuthombinga momunyanyo noshowo omahololomadhiladhilo gaaniilonga sho taya pula omagwedhelo. Nafinu okwa tsikwa woo ondjo yokutya oye a hongolola noku hwahwameka aalongi ya ninge ekanka.Onkene ngashingeyi Nafinu okwa indikwa kaa kuthe nando ombinga miinima yinasha na NUNW. Zamuee okwa ti Nafinu okwa lundilwa woo kutya aniwa okwa gama no ta yambidhidha, amushangandjayi nale gwa NUNW, Evilastus Kaaronda, noshowo omuperesidende eli pevi gwa NUNW, Elias Manga.Oshilyo shimwe sha Nafinu shoka inaashi tumbula edhina lyasho osha ti etulwopevi lya Nafinu oshitopolwa shiilonga ya luudha yomuulikwa hogololwa, Jerry Ekandjo. Okwa ti oshinakugwanitha shehangano ndika osho oku gamena nokukondjela uuwanawa waaniilonga, na ita ya ka longithwa kaanapolitika. Elalakano lyawo okwa ti oondyoka lyokutothamo mboka ya talika itaaya yambidhidha Ekandjo. Oshoka kapena ekankameno nuumbangi okuulika kutya Nafinu ota eta etopoko. Pahapu dhoonzo dhimwe, ewiliko lyesiku kehe kohi yuuhamushanga wa NUNW olya lundulula omusholondondo gwomadhina gaantu mboka ya li yuulikwa taya ka kalelapo ondundahangano ndjoka pokongressa yo Swapo. Omusholondondo ngoka ogwa li guna aakalelipo konyala ya za miilyo hangano kohi yaNUNW, ndele ngoka gwa lundululwa oguna iilyo yomahangano gamwe yili oo iyali omanga omahangano gamwe kagena aakalelipo.