MOLWUUNKUNDI nuukokele womukwaniilwa, aawa yaNdonga oya tameka okulwila oshipundi shuuwa.Moshikumungu shika oshitalala lela, omunyekadhi, kuku Cecilia Elifas, ota nyenyetwa kugamwe gomomalenga guuwa sho a yele Oscar Sheehama – omuntu gwambala – e mu ningi oshilyo shelelo lyomuthigululo gwAandonga molwuuwanawa we mwene.
Aantu oyendji yopombala oyi itaala kutya omunyekadhi oku na enwethomo enene nontseyo ya gwana miinima yambala nelelo lyopamuthigulilwakalo gwAandonga.
Nonando ehilathano olye eta ko ondungo moshigwana, oontamanana odhi li muuwa, dho odheka omunyekadhi, ta keelelwa kaa kale e na oonkondo muuwa nokutulwa pomutenya ngele mwene gwomakuya, tatekulu Immanuel Kauluma Elifas, a kanduka.
Aantu yambala itaya tsu kumwe naashika noya hala ku landulwe omuthigululwakalo yo ya kale koshipundi shuuwa konima yeso lyomukwaniilwa.
Oshifo shika osha yelelwa kutya aawa oya topoka moongundu ndatu, shoka inaashi monika nale muuwa waNdonga.
Olwindji opu na ashike oongundu mbali muuwa odho ihaadhi tsu dhi thithe, unene tuu momulanduli gwomukwaniilwa.
Uuwa waNdonga owa topoka moonyapi mbali – aawa yokEpale, moka omo mwa za omukwaniilwa, naawa wokOnethika, moka omo ngeno mu na okuza omukwaniilwa ngoka ta landula tatekulu Elifas.
Pashikando shika, moontamanana omwa gwedhwa ongundu ontitatu, ongundu yomunyekadhi, taku ti okwa hala a kanyatele oonkondo dhambala ngele mwene gwuuwa okwa kandula ondjatha.
Mboka ya thika pomunyekadhi otaya ti aantu oya hala oku mu lya oshipungo molwaashoka ke shi Omundonga ihe Omungandjela, noya hala oku mu tula pomutenya konima yeso lyomushungu.
Uuwa wokOnethika nowokEpale owa hala okutula uukuni kumwe wu lwithwe omunyekadhi, ngoka taya ti ota ningi kehe shoka a hala opo a kwashilipaleke oonkondo dhe pombala nomelelo lyomuthigululwakalo gwAandonga molwaashoka omusamane gwe okwa kulupa nokwa nika uunkundi.
Otaku hokololwa kutya muule womimvo dha konda pomulongo dha piti, omunyekadhi okwa kala ha kutha ombinga momutumba gwelelo lyopamuthigululwakalo, noye wo a kala newi momauliko nomatidho gomalenga.
Oonzo dhomuuwa odha ti, pamuthigululwakalo, omunyekadhi iha kutha ombinga moonkundathana dhelelo nenge meuliko lyomukwaniilwa.
Oshifo shika osha lopotele kutya omalenga gamwe inaga nyanyukilwa euliko lyaOscar Sheehama a ninge oshilyo shewilikongundu lyelelo lyopamuthigululwakalo.
Oyendji oye na omaipulo ngele omukwaniilwa oye tuu shili u ulike Sheehama, taya ti Sheehama ke shi omutekulu, ihe omutekulululwa gwomukwaniilwa, taya ti omunyekadhi oye ta tampagula onkalo, ta yokele omulilo gwongula peha lye.
Opu na wo omihapo kutya omunyekadhi oye a tidhitha elenga enene Boas Mweendeleli, ngoka taku hokololwa kutya okwa li omunawino miipambele yuuwa waNdonga.
Aanawino otaya ti Mweendeleli okwa li a hala uuwa wokEpale wu yapukile wokOnethika konima yelelo lyomukwaniilwa Elifas ngashi osho shu uthwa pamulandu, omadhilaadhilo ga yooloka kugomunyekadhi, nosho nee she mu tidhitha.
Omunyekadhi okwa kala nale a taalelwa kombanda yoonyala kuyalwe manga ina yela Sheehama, ngoka taku ti okwa tulwa puulenga wambala ye ina ningwa tango elenga ekuluntu.
Oontamanana odha tameke konima yomimvo omulongo dha piti sho omukwaniilwa Elifas a tseyitha kutya oku ulika omutekulululwa gwe, Shuumbwa Nangolo oye e mu landule.
Molwaashoka oshi li pondje yomulandu gwoshito, shika oshe e ta ehilathano mokati kaawa.
Pamuthigululwakalo, omukwaniilwa oha landulwa kaatekulu yomekoto ngele omo ye li momwenyo, ihe ha kaatekulululwa.
Etompelo etiyali olyo ndyoka kutya opu na omapipi gaali pokati kaNangolo naathigululi yoshipundi shuuwa.
Etompelo etitatu, Nangolo ogwomuuwa wokEpale, ashike uuwa wokOnethika owo wu na okuya koshipundi pethimbo ndika.
Patompelo etine, momuthigululwakalo, omulanduli gwomukwaniilwa iha tseyithwa moshigwana, nomuulikwa ihe shi tseyithilwa.
Muuwa ohamu tothwa ashike oohandimwe oyo haya nothelwa ko. Shika ohashi ningwa molwaashoka uuwa ohawu ka tokola konima yeso lyomukwaniilwa ngele omuulikwa oye tuu ta yambwa.
Sho omukwaniilwa Paulus Elifas a hulitha mo1970, omumwayina Titus Mvula oye a li e na oku mu landula ashike osha lundululwa molwaashoka okwa li athiga po egumbo lye lyopamuthigululwakalo a ka kale mondoolopa.
Oshipundi osha pewa Filemon Shuumbwa Elifas, ngoka a si meni lyomimvo ndatu dhelelo lye. Konima yeso lye, aawa oya tokola Shuumbwa a landulwe komumwayinamati Immanuel Kauluma Elifas opo ku kalekwe po elelo lyuuwa wokEpale molwaashoka Paulus Elifas naFillemon Shuumbwa inaya lela omimvo dha konda puntano manga inaaya hula ko.
Molwaashoka Nangolo okwa adhika nale a gonda omukiintu gulwe, okwa tindi okutenywa mombala.
Sho a pulwa a tye ko sha, omunyekadhi okwe shi yolo po ee tu ukitha omapulo kuamushanga gwelelo lyopamuthigululwakalo, Josef Asino.
Otaku hokolwa kutya okwa li a hala a hokanithe mbaka yaali molwaashoka aana yomukwaniilwa ihaya ningwa aakwaniilwa ashike aatekulu yawo, yavalwa kaakiintu aana yomukwaniilwa ohaya yambelwa uukwaniilwa.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
