Komufalandjai wopolifi Joseph Shikongo okwa ulika Benjamin Mutongolume a ninge omulanduli womupedu presidente Lucia Witbooi.
Euliko eli ola ningwa nande omunambelewa ou oku na ondjokonona yokulongifa ondjebo yaye papuko kOmbaye.
Oshiningwanima osha ningwa muSeptemba odula ya dja ko eshi Mutongolume vati kwa li a umba ondjebo pefimbo leenamanana nomukwashiwana pondingosho.
Odjo i na ouyelele kombinga yoshikumungu eshi oya ti, ondjebo okwa li ya umbwa pefimbo leenamanana, nande osheetifi inashi yela naana nawa.
Omukanda wa nyolwa mulotete Oktoba 2025 owa koleka euliko laMutongolume.
Momakwatafano opamushangwa, Shikongo okwa pula omunambelewa a tembulwe koshikondo sheameno mombelewa yakula yopashiwana yopolifi a ye koshikondo shokwaamena ovanambelewa vakula vepangelo koshi yombelewa yomupedu presidente.
Shikongo okwa ti elunduluko eli okwa li la ningwa neenghono odo a pewa kokatendo kopolifi, komudo 1990.
Omukanda natango owa koleka kutya Mutongolume ota ka kala omunambelewa weameno wopaumwene womupedu presidente.
Euliko laye otali ya noshimaliwa shomindjalo shi fike poN$7 991 komudo noshimaliwa shoiponga shi fike poN$7 034 komudo.
Eshi kwa li a dengelwa a tye sha, Mutongolume tete okwe likala kutya ke na ouyelele kombinga yoshinima osho, ta ti omunhu ou ta popiwa haye.
Ashike nee, konima okwa ka itavela oshipofa, ta ti: “Noho oshipofa osho osha potokononwa nale.”
Omukulunhu woshikondo shovafimanekwa, komisina Michael Abraham, okwa anya okutya sha oshivike sha dja ko.
Okwa ti ita dulu okukoleka oukwatya womunhu ou te mu dengele, nonghee nee, ita dulu nande okukundafana kombinga yoshikumungu eshi.
“Kandi ku shii, ndee oshidjuu okupopya nomunhu dihe mu shii. Keshe umwe ota dulu okudengela nge ndee ta ti oye lyeelyelye. Molwoshinima osho, itandi popi naave,” osho a ti ngaho.
Omupopiliko wopolifi wopashiwana omupedu komisina Kauna Shikwambi Etitatu okwa lombwela oThe Namibian kutya pefimbo loshiningwanima, Mutongolume okwa li a ya noilonga koshitopolwahoololo shErongo ashike pefimbo loshiningwanima kali moilonga.
Okwa ti oshipofa okwa li sha patululwa, eshi a umba ondjebo medu lamuni.
Oshiningwanima okwa li sha konakonwa.
She likolelela kuShikwambi, omakonakono okwa pwa petameko lodula ei. MuJanuali, omunambelewa okwa li a pewa ehoololo lokufuta oshimaliwa shi fike poN$3 000 ile a ye modolongo eemwedi hamano.
“Etembu laye ola hangika nale li li metifa manga oshiningwanima inashi ningwa nonghee nee, etembu laye kali na sha noshiningwanima nandenande.
Omunambelewa oku li natango moilonga,” osho a ti ngaho.
Shikwambi okwa weda po kutya opolifi ihai popile omalongifo endjebo apuka.
“Opolifi yaNamibia ihai popile okukwata eendjebo nai, kutya nee okomunambelewa wayo ile keshe ngaa omunhu e na omukanda wondjebo.
Eendjebo kadi shi oudanaukifo, onghee nee nadi longifwe oilonga yado, unene ngaa peemhito opo pu na lela oshiponga naa po omunhu ita dulu okukala ine liamena,” osho a ti ngaho.
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
