Muharukua a fiya po onguduyoPopular Democratic Movement

… Okwa xulifa po oilonga yaye mongudu nomomutumba wopashiwana

Omunapolitika wongudu yoPopular Democratic Movement (PDM) Vipua Muharukua okwa fiya po ongudu nomutumba wopashiwana ta ti omolwomaupyakadi kombinga yoinima ihe na oshilonga oyo i li mongudu.

Etitatu okwa ti vali okwa hala okukakonga oulifilo muwa.

“Oinima yomeni loPDM kai na oshilonga nandenande paudeko lange. Etomeno lange lokufiya po oilonga okwa li la yandjwa koPDM nokopaliamente,” Osho a ti ngaho.

Omuleli wongudu yoPDM McHenry Venaani Etitatu okwe likanyuna omapopyo oo taa ti kave na ombili naMuharukua.

“Fye nakaume kange otwa popya lwaxuuninwa oshivike sha dja ko mopaliamente … Okutya otwa kala inatu popya eedula oipupulu … Onda enda oyoongalele ihapu omo kwa li hatu paafana omadilaadilo,” Osho a t ngaho.

Venaani okwa ti exulifepo loilonga laMuharukua ola endelela unene a tala kutya Muharukua okwa li kwa teelelika a ka ninge omukondjifi waye koshoongalele shonguduo sho tashi ka hoolola pelesidente wongudu.

“Itandi dulu okupopya kutya oshike sha eta etokolo lopaumwene lomunhu oo kwa li a hala okukaya momahoololo oshipundi shopombada shongudu eemwedi da dja ko ndee mepakumo leisho okwa ninguluka,” Osho a ti ngaho.

“Oshi pu okutya opolotika oshinima tashi pula oulefimbo wonghalamwenyo. Iho teya ashike oyiimati diva noupu,” Venaani osho a ti ngaho.

Venaani okwa ti ongudu oya kala nale nokumona ovanhu tava xulifa po oilonga monakudiwa, ashike ovaleli vashona ovaxulifa po oilonga ndee tava pingenwa po mongudu”.

Okwa ti okuwete kutya ongudu otai ka kumwa nai keyo laMuharukua”.

Venaani okwa ti okwa tambula ko ovakondjifi ovo va hala okukemukondjifa.

“Ondi na eepelesenda di dule 80 dovayambididi vongudu, eshi oshili kaishi omahokololo. Ovo tava ti nandi ye, natu ka tale eenghono davo koshoongalele osho tashi ka hoolola pelesidente. Oshike hatu nuka po oshoongalele? Oindjemo kai shiivike,” Osho a ti ngaho.

‘OINIMA YOPAUMWENE’

Hamushangandjai woPDM Manual Ngaringombe okwa koleka kutya Muharukua okwa fiya po ongudu Etitatu. “Eeno otushi shi. Okwa ti okwa ota i molwoinima yaye yopaumwene,” Osho a ti ngaho.

Ongudu otai ka kala ina oshoongalele shayo lwopexulilo lodula neudo, osho tashi ka pula opo Venaani a hoololululwe a ninge pelesidente wongudu.

Oshifokundaneki shoThe Namibian okwa li sha lopota oshivike sha dja ko kutya ovaleli vamwe vongudu yoPDM okwa li va hala Venaani natango oye a ninge pelesidente wongudu ina kondjifwa koshoongalele osho hashi hoolola pelesidente wongudu, osho sha teelelika shi ka kale ko komafiku okomesho.

Muharukua , oo kwa li a talika kutya oye ta dulu okupingena po Venaani, oshivike sha dja okwa li a popya kutya yee ke na ehalo meenghatu dopombada delelo longudu.

“Kandi na ohokwe yokupopya kombinga yoshoongalele shongudu nongeenge omhito youpelesidente otai ka kondjifwa ile itai ka kondjifwa, kashi na oshilonga kwaame osho,” Muharukua osho a ti ngaho Etitatu.

Venaani okwa ti ota ka kufa ombinga momahoololo oupelesidente wongudu koshoongalele osho tashi ka ningwa kongudu.
Ngaringobe okwa ti oshinima eshi itashi ka iwa nande moshipala kexulifepo loilonga laMuharukua.

“Ongudu ehangano li na omhilandu odo tadi i wilike. Onghee nee, osho inashi lunduluka nande, ehangano oli na okuninga oinima yalo aishe, mwa kwatelwa oshoongalele osho tashi ya ngaashi ekotamhango lalo tali ti,” Osho a ti ngaho.

Hamushangandjai okwa ti ke na nande ouyelele wa sha kombinga yongudu tai i ehalo laMuharukua lokuninga pelesidente wongudu moshipala
“Kamu na nande ouyelele mombelewa yange oo tau imbi Muharukua aha kufe ombinga momafiyafanepo oupelesidente wongudu ile keshe ngaa omhito mongudu. Ongudu yoPDM okwa li ya totwa po nomilandu doudemokoli ndee osho osho shi na okukala ngaho,” Osho a ti ngaho.

‘ONGUDU YA NYIKA OSHIPONGA’

Oshilyo shimwe shongudu Etitatu osha ti kutya mongudu omu na omhepo ya kaka.

Okwa ti omuleli umwe a kula mongudu ina hala ovanyasha ovo ve li oilyo yopaliamente va ye momalweedo ile va waimine oukomisi vovanapaliamente ovo va hala.

“Oha lopota keshe shimwe kuVenaani,” Odjo osho ya ti ngaho.

Odjo oya ti Muharukua okwa li natango a udanekelwa okulela ongudu, ashike eshi inashi ningwa, eudaneko e li okwa li la ningwa nalenale.

“Venaani okwa fa ita ka yandja oulele diva. Muharukua keshe efimbo oye ngaa ta lundililwa oinima aishe. Otwa teelela okukanifa oilyo ihapu nande ongaho. Yee natate waye ove na eenghono nai moshitopolwa shaKunene,” Osho a ti ngaho.

Omundjadjukununi woikwapolotika Rui Tyitende okwa ti osha yela nawa kutya Muharukua naVenaani ova kala ve na ekwatafano lihe shi liwa okudja ngaa eshi kwa li a kufwa onghatu youwiliki woPDM momutumba wopashiwana.

Muharukua okwa li a kufwa onghatu ei ndee tai pewa Elma Dienda.

“Eshi mutu sha eta oshinima eshi osheshi Muharukua kwa li a yambidida Mike Kavekotora ponhele yaVenaani, oo naye a dja koKaokoland, opo a ninge omuleli wOvaherero,” Tyitende osho a ti ngaho.

Okwa ti ehalo laMuharukua lokukufa ko Venaani koshipudi ola eta omatopauko mongudu shaashi opu na ovaleli vamwe ovanyasha ve li olwaamambinga.

“Natango, eshi otashi ulike kutya eengudu domilameno inadi kula natango opo di dule okutambula ko omadilaadilo a yooloka avakwao kombinga yeengudu davo,” Osho a ti ngaho. Tyitende okwa ti oinima i li ngaho mopolotika oya teya po eengudu dihapu dopolotika.

“Epulo la fimana oleli kutya paife nee eshi a xulifa po oilonga, ota ka lombwela ovanhu koshitopolwa shaKunene opo vaha hoolole oPDM? Efimbo ashike li na okushi ulika,” Osho a ti ngaho.

Oo e li omuunganeki wongudu koshitopolwa shaShana, Teofilus Kamati, oye a shikula ko momusholondodo wopaliamente.