Minista mu kulu ta pula N$500 000 mwolwoetumwalaka lokoWhatsApp

DR Bernard Haufiku, oo a li nale ominista youndjolowele nomayakulo onghalafano, okwa hala omunangeshefa Martin Shipanga opo e mu fute N$500 000 molwokatumwalaka kokoWhatsApp oko a shanga te mu lundile kutya ota longifa ofamili yaye opo a vake oimaliwa yepangelo.

Ouyelele woshibofa shenyateko loukwatya womunhu owa yelifwa nawa meembapila odo di li komhangu yopombada mOvenduka, tadi ulike kutya, Haufiku, oo kwa li ominista youndjolowele nomayakulo opanghalafano okudja 2015 fiyo 2018, ota pula N$500 000 kuShipanga eshi a kakeka efimano laye nondjokonona yaye.

Haufiku okwa ti omapopyo a Shipanga aa puka notaakakeke oukwatya womunhu, nokwa li a udika ko kwaavo ve a lesha kutya yee ombudi, okulihole, nokuna ko ashike nasha nayemwe ponhele yOvanamibia.

“Etumwalaka olo kwa li la tulikwa ola ti kutya Haufiku, peha na oumbamngi washa u yambidide omapopyo, okwa longifa ovakwapata vaye opo a vake po oimaliwa yepangelo, ove mu lopota kokakomisi ha kaungaunga noulingilingi moNamibia (ACC).

“Haufiku okwa ti yee ke na nande ofiku a vakele oimaliwa yepangelo ile a longifa ovakwapata vaye okuvaka oimaliwa yepangelo, nokapa li nande efiku kwa li a twalwa koACC medina eshi a vaka po oimaliwa yepangelo.

“Eshi oshili shaashi kapu na nande oshibofa shimwe shoumbudi ile shoshimbuluma shimwe kwa li a tulilwa mo, ile pu na nande oshimwe shikulu ile inashi pwa tashi konaakonwa koACC kombinga yaye,” Osho a ti ngaho. Haufiku okwa ti osho shi li komalungula osha dja kongudu yoWhatsApp haku tiwa ‘Rundu Project’, oko aveshe voo Nashipanga ve li oilyo. Etumwalaka okwa li la tumwa momafiku 23 Juni 2023. “Etumbulo loipupulu nolokukakeka kali na shili, okwa li la shangwa nelalakano lokukakeka edina laHaufiku, ondjokonona yaye nefimaneko laye nokumonika ko nai koilyo ikwao yongudu yoWhatsApp nokukeshe omunhu ou a lesha omapopyo oo,” Eembapila domhangu osho da ti ngaho. Oveta yokunyataka oukwatya womunhu moNamiba oye likolelela koRoman law.

Opo u vene okukakekelwa oukwatya, omunhu ou a tula mo oshibofa momhangu okuna okuulika kutya omufeekelwa okwa nyola moifo omatumbulo oo taa kake oukwatya womunhu.. Haufiku okwa ti oWhatsup otai dulu okuleshwa kushe umwe, ndee eshi ondjokonona yaye ya ponokelwa oshe mu ehameka neenghono..

“Natango vali, oshinima eshi oshe mu ehameka pamadilaadilo, novakwashiwana oveshi itavela, osha fifa nge ohoni. “Elalakano lokuninga omapopyo oipupulu okwa li ashike okukakeka edina liwa laHaufiku,” Eembapila osho da ti ngaho.

Haufiku okwa hala Shipanga opo a ningulule omapopyo aye oo ndele ta yandje ombili kongudu yoWhatsApp oko kwa li a shanga ngaho.
Shipanga omukulunhuwiliki mu kulu woNedbank, yee omwene woradio yomOndangwa yedina Shipi FM.

Ina nyamukula omapulo oo a tuminwa koThe Namibian oshivike eshi. Haufiku okwa kalelwa po kuFrancois Bangamwabo okudja koFB Law Chambers, omanga Karin Klazen a dja koEllis Shilengudwa Incorporated a kalela po Shipanga.
Haufiku ina tya kosha koshinima eshi oshivike eshi.

Oshibofa okwa li sha undulilwa komesho momafiku 23 Marsa mEtivali opo ku likundwe.
Haende Kaijata Kangueehi okwa ulikwa onga omwaangukununi.