Mbumba ke shi ngee oproyeka yogreen hydrogen otai pewa oushima kovanhu vamwe

Pelesidente Nangolo Mbumba okwa ti ina uda oupyakadi washa womudingonoko tau popilwa oproyeka yepangelo yogreen hydrogen.

Mbumba oshinima eshi okwe shi popya pefimbo olo kwa li ta popi koGerman Etivali eshi kwa li a pulwa kombinga yovandjadjukununi ovo tava ti oproyeka otashi dulika yeete omaupyakadi, mwa kwatelwa omaupyakadi opamudingonoko.

Omulopoti okwa pula Mbumba: “Oto ti ko shike kovandjadjukununi ovo tava ti oproyeka otai eta omaupyakadi ape, mwa kwatelwa omaupyakadi opamudingonoko?”

Mbumba okwa ti: “Oshikando shotete handi udu oshinima osho. Ohandi ti oshikando shotete handi udu kutya opu na ovanhu tava yandje oushima koshinima osho.” Nande opu na ovanawino moinima ya pamba omidingonoko kombinga yomaupyakadi oo oproyeka tai dulu okweeta.

Vamwe vomwaavo ehangano ledina Namibian Chamber of Enviroment olo kwa li la popya muMei kutya oproyeka yogreen hydrogen oyo ya fanekwa koumbuwanhu waNamibia nai kalekwe fiyo kwa ningwa omakonakono opamudingonoko kutya otai dulu naana okukuma omudingono ngahelipi.

Momukanda wavo, tau tale komaupyakadi oproyeka moTsau //Khaeb National Park, ehangano ola mona kutya oproyeka otai dulu okweeta oupyakadi wakula keenhele dimwe dopaushitwe di li monhele omo.

Oproyeka yoHyphen, oyo i li koTsau //Khaeb National Park moshitopolwahoololo sha//Kharas, oproyeka imwe oyo i na ondilo moNamibia, i na ongushu i li lwopeebiliyona N$190.

Oproyeka ei otai kwatelwa komesho kehangano ledina Hydrogen Energy consortium, li kwetelwe komesho kehangano ledina Enrtrag laGerman, olo li na oufemba woproyeka oyo oule weedula 40.

Hyphen okwa ti oproyeka ei otai ka eta eemhito doilonga di li 15 000, omanga German ta ka mona oshimoko shokweeta eenghono.

Omunawino moinima ya pamba omidingonoko Reinhold Mangudu Etitatu okwa lombwela oThe Namibian kutya otashi kumwifa eshi pelesidente ta ti ina uda nande omaushima asha kombinga yoshinima shogreen hydrogen moNamibia.

Okwa popya kutya omalimbililo ahapu okwa kala nokweetwa koluheela kutya inaku ningwa omapulaapulo awana kombinga yeeproyeka edi, unene ngaa kombinga yokuteyaula po onhele yedina Tsau //Khaeb National Park.

“Ei onhele i na oinima yopaushitwe ya yooloka, ndee ondunge yokutula mo omatungo monhele omo otashi dulika i ete omaupyakadi ahapu,” Mangundu osho a ti ngaho.

“Ehangano loNamibian Chamber of Enviroment ola pula opo ku kongwe omukalo we lifikamena po nou li pauyelele wokuninga omakonakono opamudingonoko woshikondo shogreen hydrogen, tali yeleke kutya omayambulepo oo taa pulwa otashi dulika a ka nyanaune oukwatya wonhele ei, oushitwe nosho yo omatalelepo monakwiiwa,” Osho a weda po ngaho.

Okwa popya kutya omaupyakadi okwa hololwa nawa meelopota da yooloka, osho tashi ningi ashike okweekelashi kwomaushima kwapelesidente ku kale kwa nyika oshiponga.

OSHO SHA TEELELWA KOMBINGA YEENGHUNDAFANA

Shimwe vali, eshi a popya kombinga yeenghundafana odo di li metifa domadipayo anghi na nghenda pefimbo lomapulaapulo Etivali, Mbumba okwa ti ota kongo omukalo wokuvalula eemwenyo odo da kanifwa.

“Ohatu dulu okumona omukalo, kau shi ou u li mondjila filufilu, ashike ngeno omukalo ngaa wokuulika kutya omapuko okwa tambulwa ko noshikolo osha futwa,” Pelesidente osho a ti ngaho.

Namibia naGermany ova kala ve li meenghundafana dokufuta oshikolo shomadipayo anghi na nghenda oo kwa li a ningwa pokati komudo 1904-1908, kwa li mwa fila Ovanama nOvaherero vahapu neenghono.

KOMBINGA YOMEVA

Mbumba natango okwa ti epangelo ola taalela oupyakadi wokufa eemboola domeva. “Shaashi apa hatu fe, omeva oku na oshimongwa. Ominino odo twa kendabala okukufa opo pu na omeva, eenghono inadi wana ndee omukalo oo kwa li hatu dulu okulongifa okutwala ashike omeva neeloli,” Osho a ti ngaho.

“Manga inandi dja ko keumbo, okwa li nda lombwela ombelewa yomuprima minista, ombelewa yomupedu prima minista, minista oo e na oshinakuwanifa shoilonga noyeendifo, nosho yo minista wounamapya nounaimuna opo va kwashilipaleke kutya eeloli oda twikila nokuyandja omeva,” Osho a ti ngaho.

In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.