Mbumba a ningi omupelesidente waNamibia

Nangolo Mbumba

…inamu ngwangwana

Omupelesidente mu pe Nangolo Mbumba, okwa yeleka kutya ota mane ko ashike oshitukulwa shaGeingob osho sha shaala ko.

Mbumba, eshi okwe shi popya Oshondaxa eshi kwa li a ninga eano onga omupelesidente omutinhe waNamibia. Pefimbo Mbumba ta popi ngaha okwa li pamwe nomupedu pelesidente waye Netumbo Nandi-Ndaitwah.

Geingob okwa fya Oshoondaxa po00h04 konima eshi kwa li ta lwifa oudu wokaangela omanga kwa li a ka monene epango koAmerika konima yomafiku ashona.

Mbumba okwa li a ningilwa eano konima ashike yeevili o12. Eshi osha ningwa opo oilonga yelelo loshilongo ihai we moshipala.

“Itandi ka kufa ombinga momahoololo. Inamu ngwangwana. Otamu lilombwele nale omahokololo. Ohandi ke muwilika ashike oulefimbo oo Geingob kwa li e na okulela. Otu liudite. Natu liyambidideni,” Mbumba osho a ti ngaho.

Eshi oshe ya konima eshi omundjadjukununi woikwapolitika Rui Tjitende, a lombwela oDesert Radio kutya omupelesidente mu pe ota ka lela ashike fiyo omuMaalisa 2025, eshi taku ka nangekwa omupelesidente umwe konima yomahoololo.
Mbumba Oshoondaxa okwa dimbulukwa efimbo olo a kala ta longo naGeingob.

“Ngeenge ohandi popi oinima aishe ei handi dimbulukwa, nghee twa shakena naGeingob moNew York mo1967, okwa li nale omuwiliki wovalihongi pefimbo opo. Okwa li nale omukalelipo wovalihongi kwinya. Eshi twe ya moNamibia, okwa li handi longo mombelewa yaye,” Osho a ti ngaho.
Mbumba okwa tambulako oshinakuwanifa .

“Onda tambula oshinakuwanifa eshi shi djuu opo ndi lele ovaNamibia nelitulemo nelipakemo la kola,” Osho a ti ngaho.

Mbumba okwa ti oshi li tashi mbilipaleke ngee oshilongo tashi kala sha ngungumana pefimbo loudjuu ou.

“Eshi okuyandja efimaneko komuleli woshiwana nokwaashi yee kwa li ta lalakanene, okwa li omuwiliki mokweeta po ekotamhango laNamibia olo tali tuwilike nena,” Mbumba osho ati ngaho.

“Ondi wete kutya mombelewa yomupelesidente, omu na omhito yoilonga i li mombelewa yomupedu pelesidente,”
Mbumba osho a ti, eshi ta shiivifa Netumbo Nandi-Ndaitwah onga omupedu waye.

Natango Oshoondaxa Mbumba, okwa shiivifa kutya omupedu pelesidente waye, Netumbo Nandi-Ndaitwah vonomuprimaminista Saara Kugongelwa-Amandhila otava ka wilika okakomisi kopombada neeminista dikwao moKabinete.

“Otwa shakena nale notwa ninga omapulaapulo, notwa tota okakomisi opo ka ninge omalongekido oo a pumbwa okuningwa omanga omupelesidente wetu Hage Geingob ina pewa onhele yaye mondjokonona yomapendafule a Namibia,” Osho a ti ngaho.

Okwa weda po vali ta ti okakomisi aka otaka ka longa nokakomisi aka haka longo momapako epangelo taka wilikwa kuhamushanga wokabinete, George Simataa.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!