Mayola gwaNiipa a kuthwa miilonga pakathimbo

Augustus Nangolo

Mayola gwondolopa yaNiipa, Augustus Nangolo, okwa kuthwa onkatu ye pakathimbo komukwatakanithi gwongundu yoSwapo moshitopolwa shaShikoto, Armas Amukwiyu, oshiwike shika.

Nangolo okwa tseyithilwa ekutho miilonga pakathimbo okupitila mombapila ndjoka a tuminwa kuAmukwiyu mEtiyali sho taku hokololwa a yambidhidha ongundu yompilameno ndjoka tayi kondjithathana nongundu yoSwapo.

Nangolo, ngoka wo e li kansela gwoSwapo, okwa hogololwa nokuningwa mayola gwaNiipa omumvo gwa zi ko. Otaku hokololwa kutya okwa kuthwa onkatu ye yuumayola sho u ulike kansela Patemoshela Nakanyala gwongundu yoIndependent Patriots for Change (IPC) oye a ninge omupehamayola.

“Oto tseyithilwa ngeyi kutya okwa kuthwa iinyangadhalwa [iinakugwanithwa] ayihe yongundu momudhingoloko nenge pondje yomudhingoloko gwaNiipa, tashi tulwa miilonga mbala,” osho Amukwiyu a popi ngaaka montumwafo.

Amukwiyu okwa lombwele wo mayola kaakwatathane nElelo lyOndolopa yaNiipa, osho wo omukuluntuwiliki nenge ookansela dhoSwapo kombinga yekutho miilonga lye. Nangolo okwa koleke konzonkundaneki ndjika kutya okwa yakula ombapila ndjoka ye mu tseyithila kutya ota kuthwa miilonga pakathimbo ashike nando okwa popi kutya Amukwiyu ke na oonkondo dhoku mu kutha miilonga pakathimbo nonkene minista gwoondolopa nomapendulopo gokomikunda oye awike ta vulu oku mu kutha miilonga. Okwa popi kutya ekutho miilonga lye olya ningwa omolwoshinima shopaumwene ishewe kali li pamulandu. Amukwiyu ina yamukula ongodhi sho a kwatathanwa naye konzonkundaneki ndjika.

Stay informed with The Namibian – your source for credible journalism. Get in-depth reporting and opinions for only N$85 a month. Invest in journalism, invest in democracy –
Subscribe Now!