OMUDHEULI gwosipana yoapshigwana yetanga lyokoompadhi, Ricardo Mannetti okwa ti uudhano mboka oBrave Warriors tayi ki itaalela naCongo itawu kala uupu.
Uudhano mboka owu li ko nee okutala ngele oBrave Warriors tayi she enditha nawa opo yi vule oku ya kekopi lyiigwana yaAfrica, omvula tayi ya yomumvo 2015. Uudhano woBrave Warriors naCongo (Brazzaville) owu li ko nee omwedhi tagu ya.
Namibia ote ki itaalela nee naCongo muudhano wotango tawu ka kala ko momasiku 17 Mai tawu ya ka dhanenwa mOvenduka nuudhano uutiyali otawu ka kala koBrazzaville momasiku 31 Mai.
Mannetti okwa ti sha pumbiwa okwi ilongekidhila nawanawa uudhano mboka naCongo (Brazzaville) mboka ngele oye wu sindana opo nee taya ka ya mongundu yaA moka nee mu na Sudan, Nigeria naSouth Africa.
“Otu na lela okutamekela lela petameko naantu inaya pumbwa manga okupopya naNigeria naSouth Africa.
Tango otatu ka taalela manga Congo notu na okukala twa tula nee ookoola muudhano mboka tawu ya wu kale moNamibia momasiku 17 Mai molwashoka koBrazzaville koCongo itashi ka kala nando oshipu”, Mannetti a ti ngawo.
Omudheli gwoBrave Warriors Mannetti okwa ti ke shi naanaa oshindji kombinga yosipana ndjoka yaCongo ihe shoka e shi osho owala kutya oyi na aadhani haya dhanene koliha yaFrance nokwa ti sha simana oku she enditha nawa muudhano wotango mboka tawu ya okukala moNamibia.
Okwa ti oBrave Warriors otayi kala yi ilongekidhila nawa uudhano mboka nokwi indile kaayambidhidhi ya ka ye yambidhidhe osipana opo yi sindane po uudhano mboka.
Osipana ndjoka tayi ka sindana pokati muudhano mboka tawu ya wu kale pokati kaNamibia naCongo (Brazzaville) otayi yi kedhingoloko lya landula ko hoka tayi ki itaalela ongele naLibya nenge Rwanda.
Ngele oBrave Warriors oya sindana po nee uudhano mboka yi li naCongo (Brazzaville), uudhano we wawo wa landula ko tango otawu ka kala wo moNamibia momasiku 19 Juli nuutiyali otawu ka kala ko momasiku 2 Auguste.
Osipana ndjoka tayi ka sindana po nee uudhano mboka otayi ka ya mongundu moka mu na Nigeria, Sudan naSouth Africa.
Omaudhano ngoka gopaangundu otaga ka dhanwa nee pokati komasiku 5-6 Sepetemba nomasiku 10 Septemba; 10-11 Kotoba nomasiku 15 Kotoba; 14-15 Novomba nomasiku 19 Novomba.
