‘Kasha li oshiningilawina’

Ondjayi yetanga lyopolisi moshilongo Joseph Shikongo okwa popi kutya oshiponga shoshihauto shoka ta tamanekelwa sha landula sho mwa kanene oomwenyo dhaantu yatatu, sha ningwa popepi nOndangwa mo2022, inashi ningilwa owina.

Oshiponga shoka osha faalele oomwenyo dha yatatu: Sofia Ananias, Fransa Ndengu and Stefanus Lukas.

Shikongo ota ningilwa omakonakono ge na sha noshipotha shedhipago lyaashi lyoshiningilawina, nokuhinga nuuhasha sha landula sho oshihauto shoka a li ta hingi sha mono oshiponga sho shi idhenge omutse nomutse notuukala, sha ningilwa mopate, pwIindangungu, moshikandjohogololo shaKaku [moshitopolwa shaShana], momasiku 30 Desemba 2022.

Pauyelele wolopota yopolisi konima yoshiningwanima shoka, Shikongo ngoka a li ta hingi oshihauto she shopaumwene shoToyota Hilux shoondunda mbali, okwi idhenge omutse nomutse notuukala yoHyundai ndjoka ya li oonakusa mboka yatatu.

Okuza mpoka aakwanezimo yoonakusa oya kala taya ningi onkambadhala okumona Shikongo opo ya popye, ashike otaku hokololwa kutya ompito ndjoka inaye yi pewa.

Oshiwike sha zi ko aakwashigwana oya ningi ehololomadhiladhilo pamwe naakwanezimo moka yi indile opo Shikongo a kuthwe onkatu ye yuukuluntu wopolisi moshilongo, a gandje ombili kaakwanezimo osho wo yilwe.

Sho ta popi kombinga yoshinigwanima shoka mOshakati, uunambo, Shikongo okwa popi kutya ke wete pu na omuntu ngoka ta hingi oshihauto she mopate nelalakano lyokwe eta oshiponga opo a dhipagele mo mboka ye li mo.

“Tse, ongaantu moshilongo shetu, kandiwete mu na omuntu ngoka ta vulu okuningila owina opo a pume oshihauto nenge e etithe oshiponga owina. Tu pitikeni oveta yi longe iilonga yawo, ano omulandu gwomompangu,” osho a popi ngaaka

Okwa gwedhapo wo kutya oshipotha shoka osha falwa wo kompangu yopamuthigululwakalo.

Onzonkundani ndjika petameko lyomwedhi gwa zi ko, oya kundaneke kutya epeko lyoshipotha sha Shikongo okwa li natango tali ningilwa omakonakono nokwa li lya tegelelwa li pewe Ombelewa yOmutamanekindjayi manga omasiku 15 Desemba 2023 inaaga pita.

Ombelewa yOmutamanekindjayi oya tegelelwa yi kale ya ninga etokolo kombinga yoshipotha shoka kuyele numvo.

Opwa kala omanyenyeto moshigwana tashi pula kutya omolwashike Shikongo itaa kuthwa miilonga pakathimbo omanga ta ningilwa omakonakono osho wo kutya omolwashike itaa kwatwa po. Ashike omumvo gwa zi ko, Shikongo okwa lombwele onzonkundaneki ndjika kutya oveta oyo nayi ninge etokolo ngele otashi pumbiwa a tulwe miipandeko.

Omumvo gwa zi ko omunandjungu gwongundu yoNamibia Economic Freedom Fighters (NEFF), Michael Amushelelo, okwi indile uuyuuki wu longwe kombinga yoshipotha shoka, sho a pula opo Shikongo a tulwe miipandeko mbala.

Miiningwanima ya ningwa monakuziwa, aapolisi mboka ya pogola oya tulwa miipandeko.

Iikundaneki mo2022 oya lopota kombinga ya komufala mopolisi Waldheim Nghikongwa okwa li a pumu omweendi gwokolupadhi molwaamba lwopate ya Sam Nujoma Drive mOvenduka, nokwa hulithile pehala lyoshiningwanima.

Komufala ngoka okwa tulwa miipandeko nokwa patululilwa oshipotha shedhipago lyaashi lyoshiningilawina, okuhinga e li kohi yondhungo osho wo okuhinga nuuhasha.

Nokwa mangululwa mo sho a pewa oboloha yooN$4 000.

MuDesemba 2017, omupolisi gwomOvenduka okwa tulwa miipandeko sho kwa li ta hingi e li kohi yondhungo nokwa li e etitha oshiponga shoka sha faalele oomwenyo dhaantu yaali, sha ningilwa popepi nOndangwa.

Omupolisi, ngoka ha longele koshimpungu shoombwa dhopolisi mOvenduka, okwa kalekwa mondholongo nonande okwa li a taambelwa moshipangelo shaMuthiya, pethimbo ndyoka.