Presidente wongudu yoIndependent Patriots for Change (IPC) Panduleni Itula, okwa anya omapopyo oo taa ti mongudu ove li mo vehe liudite, ta ti oipupulu, otaa pukifa nokwa nyika oshiponga.
Eelopota okudja koshifokundaneki shoWindhoek Observer Omaandaxa otadi ti kutya Itula nomunapaliamente woIPC Imms Nashinge kave liudite, Nashinge oye e li omuleli wongudu yomilameno yopambelewa momutumba wopashiwana.
Eshi kwa li ta popi noDesert FM Etitatu, Itula okwa ti olopota yoikundaneki oipupulu yongaho kombinga yomutungilo wongudu nomilandu dokuninga omatokolo nokwa lundila oshikundaneki osho sha lopota ngaho kutya otashi kundaneke oinima ihe li mondjila.
“Oipupulu ya nyika oshiponga tai lalakanene okulyatela pedu elelo lopaveta loIPC nokungwangwaneka ovahoololi,” Itula osho a ti ngaho.
“Oufemba wetu wokutwikila komesho ongongudu itau dulu okufininikwa komaliudo, omahalo noikumungu yakeshe umwe moshikondo shoikundaneki.”
Itula okwa anya kutya mongudu omu na ovanhu tava kondjele eenghono, ta ti kutya elelo loIPC otali pangelwa kekotamhango layela.
Okwa ti kutya IPC ongudu yopapolitika ya shangifwa koshi yokatukulwa 135 kokatendo komahoololo komudo 2014 nohai longo i li koshi yekotamhango laNamibia.
“IPC keshi nande onhele yomalihafifo. Ongudu yopolitika i li paveta tai kufa ombinga moinyangadalwa yopolitika moNamibia,” osho a ti ngaho.
Okwa fatulula kutya omangha oilyo yopaliamente i na oshinakuwanifa shokutota eeveta, oilonga aishe yongudu oi li natango momake apresidente, noilonga yopaliamente ohai wilikwa komitungilo da yooloka meni longudu.
Itula okwa ti okwa hoolola Nashinge a kwatele komesho oilonga yongudu mopaliamente konima yomakonakono okutala ngee ote shi dulu ngaa.
“Oshike ndi na okuhoolola omunhu ngee ondi shii kutya inandi tala ngee oku na ngaa eenghono dokuyakula ongudu” osho a pula ngaho.
Itula okwa ti hamushangandjai wopashiwana woIPC oku li ongomunashipundi woyoongalele yopaliamente yongudu oshinakuwanifa osho sha fa ashike “shomuprima minsita” wopomunghulo, novanapalimente ohava lopota okupitila kuye.
“Ohandi i mo ashike ngee pu na oikumungu oyo ya pumbwa eyambidido lapresidente,” osho a ti ngaho.
Itula okwa yelaka kutya eenghono daNashinge oda xulila moikumungu yomopaliamente, omangha oinima ikwao yakula yopapolitika nomatokolo akula e li natango mombelewa yakula yongudu.
“Ngee opu na oshinima shomopaliamente, Nashinge ohe shi kwatele komesho ongomutwe wopaliamente,” Itula osho a ti ngaho “Ashike omatokolo ngaashi okukalela po ongudu kondje yoshilongo ile omilandu dongudu ohaa ningwa kelelo longudu.”
Eshi a nyamukula omapulo kombinga yelunduluko melelo, Itula okwa ti okwa itavela neenghono adishe momalunduluko opaudemokoli nokulongekida ovanyasha opo va twikile ko.
“Inandi hala okutwikila fiyo alushe,” osho a ti ngaho. “Elelo nali yandjwe momake amwe pefimbo la wapala okupitila momilandu dopaudemokoli.”
Okwa ti kutya etokolo laye lokukala ina ya mopaliamente okwa li la ningilwa owina.
“Eshi inandi ya kopaliamente, ohandi longekida ovaleli vovanyasha va wilike ongudu noshilongo monakwiiwa,” osho a ti ngaho.
Itula natango okwa holola onghumwe kombinga yoilonga yoikundaneki, ta ti omahangano amwe oikundaneki ohaa hoolola okweendulula oinima imwe oyo a popya mangha taa fiye ko imwe nokutota omahokololo opo a nyenyepeke oinima oyo taa shange.
“Kashi fi okukundaneka kuwa oko,” osho a ti ngaho. “Okukundaneka naku yandje ouyelele womondjila koshiwana, inaku heka ile ku pukifa ovahoololi.
Okwa ti ovatoolinghundana nava kale tava koleke ouyelele nawa, ponhele yokunyanyangida omafeekelo.
“Ino tota ehokololo ndee to ya kufye tu koleke ile tu anye,” osho a ti ngaho.
“Kashi li mondjila osho.”
In an age of information overload, Sunrise is The Namibian’s morning briefing, delivered at 6h00 from Monday to Friday. It offers a curated rundown of the most important stories from the past 24 hours – occasionally with a light, witty touch. It’s an essential way to stay informed. Subscribe and join our newsletter community.
The Namibian uses AI tools to assist with improved quality, accuracy and efficiency, while maintaining editorial oversight and journalistic integrity.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
